सत्ता गठबन्धन मधेश गठबन्धन पनि हो : प्रधानमन्त्री देउवा

टुडेपाटी-
जनकपुरधाम, कार्तिक ६ गते ।

काँग्रेस सभापति समेत रहेका प्रधानमन्त्री शेरबहादुर देउवाले सत्ता गठबन्धन मधेश गठबन्धन पनि रहेको बताएका छन् । जनकपुरधाममा शनिबार सत्ता गठबन्धनले आयोजना गरेको मधेश प्रदेश भेलालाई सम्बोधन गर्दै उनले यस्तो बताएका हुन् ।

‘काँग्रेस, माओवादी केन्द्र, एकीकृत समाजवादी र लोसपाको जुन गठबन्धन छ । यो गठबन्धन गणतान्त्रिक लोकतान्त्रिक गठबन्धन हो । र यो मधेश गठबन्धन पनि हो’, उनले भने ।

नागरिकता समस्या समाधान गर्न यो गठबन्धन तयार रहेको बताउँदै प्रधानमन्त्री देउवाले गठबन्धनलाई जिताउन आग्रह गरे ।

‘नागरिकता समस्या समाधान गर्न हामी हिजो पनि पूर्ण प्रयास गरेका हौं । तर राष्ट्रपतिले प्रमाणीकरण गर्नुभएन’, उनले भने ‘हामी यो समस्या समाधान गर्छौ । त्यसको लागि यो गठबन्धन भित्रका सबै दललाई जिताउन आवश्यक छ ।’