धनुषा : एमालेकी समानुपातिक उम्मेदवार कांग्रेस प्रवेश

टुडेपाटी–
जनकपुरधाम, कार्तिक १ गते ।

नेकपा एमालेबाट मधेश प्रदेशसभा सदस्यमा समानुपातिकतर्फ उम्मेदवार रहेकी फूल कुमारी महतो नेपाली कांग्रेसमा प्रवेश गरेकी छन् ।

नेपाली कांग्रेसका सहमहामन्त्री तथा धनुषा–४ मा सत्तागठबन्धनको तर्फबाट उम्मेदवार बनेका महेन्द्र यादवले उनलाई पार्टीमा प्रवेश गराएका हुन् ।

कांग्रेस प्रवेश गरेकी महतोले एमालेभित्र तानाशाही प्रवृत्ति रहेको र मधेशी जनता तथा कार्यकर्तालाई भ्रममा राखेर नेताहरुले राजनीतिक स्वार्थ पूरा गरिरहेको कारण आफू असन्तुष्ट भएर एमाले परित्याग गरेको बताइन् ।

देशमा सबैभन्दा बढी नागरिकताबिहीन मधेशमै रहेको र अहिले मधेशको मुख्य मुद्दा पनि नागरिकता नै रहेकाले त्यस विधेयकलाई अड्काएर एमालेले मधेश र मधेशी जनतालाई धोका दिएको आरोप लगाइन् । उनले व्यक्तिगत रुपमा आफुलाई एमालेले समानुपातिक सूचीमा राखे पनि मधेश र मधेशी जनताका लागि एमालेले धोका दिइरहेका कारण एमाले छाडेको बताइन् ।

जनकपुरधाम उपमहानगरपालिका २२ मा आयोजित कांग्रेसको घरदैलो अभियानका क्रममा महतोलाई सहमहामन्त्री यादवले पार्टीमा भित्र्याएका हुन् ।