मधेश प्रदेश : गाउँपालिका अध्यक्षमाथि आक्रमण गरेको आरोपमा तीनजना पक्राउ

टुडेपाटी–
पर्सा, असोज १० गते ।

पर्सामा जनप्रतिनिधिमाथि आक्रमण गरेको आरोपमा प्रहरीले तीनजनालाई पक्राउ गरेको छ ।

जिल्लाको सखुवाप्रसौनी गाउँपालिकाका अध्यक्ष यशवन्त यादवमाथि आक्रमण गरेको आरोपमा तीन जनालाई पक्राउ गरी प्रहरीले अनुसन्धान अगाडि बढाएको जनाएको छ ।

आइतबार साँझ गाउँपालिका कार्यालयबाट घर फर्किने क्रममा अध्यक्ष यादवमाथि आक्रमण भएको थियो । अध्यक्ष चढ्ने गाउँपालिका कार्यालयको ना १ झ १६८७ नम्बरको गाडीको सीसा पनि फुटेको छ ।

सँगै रहेको ना २ च ८६६ नम्बरको निजी कार तोडफड गरी आगजनी गरिएको बताइएको छ । यादवसँगै रहेका ऋषिकुमार सहनी र नगेन्द्रप्रसाद यादव पनि घाइते भएका छन् । सहनीको हात भाँचिएको छ भने यादवको टाउकोमा चोट लागेको छ ।

तोडफोड र आगजनीमा संलग्न रहेका तीन जनालाई नियन्त्रणमा लिइएको प्रहरी उपरीक्षक रमेश बस्नेत बताए । छ । अध्यक्षमाथि आक्रमण भएको सूचना पाउनासाथ एसपी बस्नेत घटनास्थल पुगेका थिए ।