नागरिकता विधेयकबारे छलफलमा राष्ट्रपति भण्डारी

टुडेपाटी–
काठमाडौँ, असोज ४ गते ।

नागरिकता विधेयक प्रमाणिकरण बारे राष्ट्रपति विद्यादेवी भण्डारी छलफलमा रहेकी छन् । राष्ट्रपति कार्यालयका प्रवक्ता सागर आचार्यका अनुसार नागरिकता विधेयकलाई लिएर राष्ट्रपति भण्डारीले विभिन्न व्यक्तिहरूसँग छलफल गरिरहेकी छन् ।

संघीय संसद्ले दोस्रोपटक सदनबाट पारित गरेर राष्ट्रपठाएको नेपाल नागरकिता (पहिलो संशोधन) ऐन, २०७९ लाई संवैधानिक व्यवस्थाअनुसार प्रमाणीकरण गर्नैपर्ने सीमा पुगेको दिन राष्ट्रपति भण्डारी भने छलफल गरिरहेकी हुन् ।

राष्ट्रपति भण्डारीले मंगलबार साँझ पनि भण्डारीले विभिन्न व्यक्तिहरूसँग छलफल गरिरहेको आचार्यले बताए । ‘कन्सल्टेसन भइरहेको छ । विभिन्न व्यक्तित्वहरूसँग छलफल भइरहेको छ,’ उनले भने । कोसँग छलफल भइरहेको छ भनेर व्यक्ति नै भने भन्न नसकिने उनको भनाइ थियो ।

नागरिकता विधेयक भदौ २० गते राष्ट्रपति कार्यालयमा प्रमाणीकरणका लागि पुगेको थियो । आचार्यले मंगलबार उक्त विधेयक राष्ट्रपति कार्यालयमा दर्ता भएको १५ दिन पुग्ने भएकाले राष्ट्रपति भण्डारी छलफलमा रहेको बताए ।

राष्ट्रपतिबाट फिर्ता आएको विधेयक सोही अवस्थामा वा संशोधनसहित संसद्ले प्रमाणीकरणका लागि पठाएको १५ दिनभित्र प्रमाणीकरण गर्नैपर्ने संवैधानिक व्यवस्था छ । राष्ट्रपति भण्डारीले पहिलो पटक विधेयक फिर्ता गरेकी थिइन् ।