कप्तान सन्दीप लामिछानेविरुद्ध नाबालिग बलात्कार आरोपमा जाहेरी

टुडेपाटी-
काठमाडौं, भदौ २२ गते ।

नेपाली क्रिकेट टिमका कप्तान सन्दीप लामिछानेविरुद्ध नाबालिग बलात्कारको आरोपमा जाहेरी दर्ता भएको छ ।

लामिछानेले १७ वर्षकी नाबालिगलाई बलात्कार गरेको भन्दै प्रहरी वृत्त गौशालामा किटानी जाहेरी आएको काठमाडौं प्रहरी प्रमुख एसएसपी भरतबहादुर बोहोराले जानकारी दिए ।

गत भदौ ५ गतेको घटना हो । उनले निजी कारमा पीडित बालिकालाई लिन उनको होस्टल छेउ पुगेका थिए । अपरान्ह उनलाई लिन पुगेका सन्दिपले घुम्न भन्दै नगरकोट लगेका थिए । त्यहाँ खाजा खाएर फर्किँदा राति १० बजिसकेको थियो ।

उनले होस्टल राति ८ बजे बन्द हुन्छ भनेकी थिइन् । तर लामिछानेले वेवास्ता गर्दै रातिसम्म राखेका थिए ।

फर्किँएर आउँदा काठमाडौंको एक होटलमा बस्न भनेर राति दुई पटक बलात्कार गरेको पीडितको भनाइ छ । प्रहरीले मंगलबार नै पीडितको स्वास्थ्य परीक्षण गराएको छ ।

घटनाको भोलिपल्ट टी–२० सिरिज खेल्न केन्या गएका लामिछाने अहिले पनि उतै छन् ।