भारतीय कम्पनीद्वारा जनकपुर रोयल्स टिम खरिद

टुडेपाटी–
जनकपुरधाम, भदै ६ गते ।

सेप्टेम्बरको अन्तिम सातादेखि हुने नेपाल प्रिमियर लिग (एनपीएल)मा सहभागी हुने जनकपुर रोयल्स टिमलाई एक भारतीय खेल कम्पनीले खरिद गरेको छ ।

भारतको जयपुर स्थित रहेको गोल्ड स्पोर्ट्स प्रा.लि.ले जनकपुर रोयल्स टिम खरिद गरेको हो ।

गोल्ड स्पोर्ट्स प्रा.लि.का निर्देशक गौरीशंकर धमानीले जानकी माताको सेवा गर्ने सोच पहिल्यै देखि रहेकोले जनकपुरको टिम आफूहरुले खरिद गरेको बताए ।

उनले जानकी माताले बोलाएको र जनकपुरधामको विकासका साथै यहाँको खेलको विकासका लागि काम गर्ने अवसर पाएकोमा खुशी रहेको बताए ।

गोल्ड स्टोर्टस प्रा.लि.ले ८ वर्षको लागि जनकपुर टिम खरिद गरेका हुन् ।

एनपीएलमा ६ वटा टिमले सहभागिता जनाउने छ । जसमध्ये ४ वटा टिमको नाम सार्वजनिक भइसकेको हो ।

क्रिकेट संघ धनुषाका अध्यक्ष शोभाकान्त पाण्डेले यस प्रिमियर लिगबाट जनकपुरधामको प्रचार हुने बताए । उनले खेलको क्रममा जनकपुर रोयल्सको खेल हुँदा यहाँको धार्मिक तथा सांस्कृतिक दृश्यहरु देखाउने भएकाले यहाँको स्थलको प्रचारप्रसार हुने बताए ।