मधेस प्रदेश : भवन बनेको ३ वर्षमा पनि सञ्चालनमा आएनन् ‘बर्थिङ सेन्टर’

टुडेपाटी-
रौतहट, भदौ १ गते ।

रौतहटमा भवन बनेको तीन वर्ष भई सक्दासमेत प्रसूति गृह सञ्चालनमा आउन सकेको छैन ।

जिल्लाको गुजरा नगरपालिका २ को कटानी बजारमा नेपाल सरकार, गुजरा नगरपालिका र नेपाल ग्रामीण पुनर्निर्माण संस्थाको लगानीमा बनेको भवनमा प्रसूति सेवा सुरु नभएका कारण स्थानीयवासी सेवा लिन अन्यत्र जानुपर्ने बाध्यता छ ।

तीन वर्षअघि भवन निर्माणको काम सकिएको भए पनि गुजरा नगरपालिकाले प्रसूति सेवा सञ्चालनका लागि अनुमति भएका कारण स्थानीयलाई प्रसूति गराउन चन्द्रनिगाहपुर र वीरगञ्ज लगायत ठाउँमा जानुपर्ने बाध्यता छ । राति सुत्केरी व्यथा लाग्दा समस्या पर्ने उनीहरू बताउँछन् ।

रंगपुर स्वास्थ्य चौकी मातहतमा रहेको रहेको प्रसूति गृह भवन करिब ४१ लाखको लागतमा बनेको हो । ४१ लाखमा तीन कोठे भवन मात्र बनेको र त्यसमै आर्थिक अनियमितता भएको स्थानीयको आरोप छ ।

सो भवनमा प्रसूतिगृह सञ्चालनमा नआएका कारण स्वास्थ्य चौकीको सामान्य काम रंगपुर स्वास्थ्य चौकीबाटै हुने गरेको प्रमुख भुपेन्द्र चौधरीले जानकारी दिए । गुजरा नगरपालिकाले प्रसूति सेवा सञ्चालनका लागि तत्काल पहल गर्नुपर्ने स्थानीयवासीको माग छ ।