धनुषा प्रहरीले मानिस पक्राउको विषयमा गरे गलत सूचना सम्प्रेसन

टुडेपाटी–

जनकपुरधाम, साउन २१ गते ।

धनुषा प्रहरीले मानिस पक्राउको विषयमा गलत सूचना सम्प्रेसन गरेको पाइएको छ ।

बिगो मुद्दामा धनुषा जिल्ला अदालतबाट ५३ हजार रुपैयाँ जरिवाना सजाय पाएर फरार भएको भन्दै धनुषाको क्षीरेश्वरनाथ नगरपालिका–३ निवासी ५० वर्षीय मनोजकुमार सिंहलाई पक्राउ गरिएको जिल्ला प्रहरी कार्यालय धनुषाले बिहीबार प्रेस विज्ञप्ती जारी गरेको थियो ।
जिल्ला प्रहरी कार्यालय धनुषाका प्रवक्ता डिएसपी प्रदीपबहादुर क्षेत्रीले जारी गरेको प्रेस विज्ञप्तीमा पाँचजना विभिन्न मुद्दाका फरार प्रतिवादी पक्राउ गरेको उल्लेख थियो ।

जसमा विगो मुद्दामा ५३ हजार रुपैयाँ जरिवाना फैसला भई फरार रहेका सिंहलाई पक्राउ गरी आवश्यक कारबाहीका लागि धनुषा जिल्ला अदालत जनकपुरधाममा पठाइएको प्रहरीले पठाएको विज्ञप्तीमा उल्लेख थियो ।

तर, सिंहलाई पक्राउ गरेको सूचना गलत रहेको पाइएको छ । धनुषा जिल्ला अदालतले मनोज सिंहको नाममा कुनै दण्डजरिवाना नगरिएको स्पष्ट पारेको छ ।

इलाका प्रहरी कार्यालय महेन्द्रनगरलाई जिल्ला अदालत धनुषाले साउन २० गते शुक्रबार पठाएर अभिलेखमा मनोज सिंहको नाममा कुनै दण्डजरिवाना नगरिएको पाइएको उल्लेख गरेको छ ।

‘परोक्त सम्बन्धमा ताँहा कार्यालयको च.नं. ८९ मिति २०७२।०४।१७ गतेको पत्र प्राप्त व्यहोरा अवगत भयो’, अदालतले प्रहरीलाई पठाएको पत्रमा लेखिएको छ ‘अतः उक्त पत्रमा उल्लेख भएको लगत नं. ०८ मा मनोज कुमार सिंहको नाउँमा कुनै दण्ड जरिवान कायम नरहेको लगत अभिलेखबाट देखिएको व्यहोरा जानकारीको लागि अनुरोध गरिन्छ ।’

प्रहरीले निर्दोश व्यक्तिको चरित्र हत्या गर्ने गरी झुटो विवरणको प्रेस विज्ञप्ती जारी गरेको भन्दै मनोज सिंहले आपति जनाएका छन् ।