सिरहा नपालाई सात दिनभित्र जवाफ पेस गर्न आयोगको आदेश, सूचना माग्दा अपाङ्ग शिक्षकलाई गरिएको थियो सरुवा

टुडेपाटी–
सिरहा, साउन २० गते ।

सिरहाको सिरहा नगरपालिकालाई राष्ट्रिय सूचना आयोगले सात दिनभित्र लिखित जवाफ पेस गर्न आदेश दिएको छ ।

आयोगका प्रमुख सूचना आयुक्त महेन्द्रमान गुरुङ्ग आयुक्तहरु कमला वली थापा र रत्नप्रसाद मैनालीले सूचना उपलब्ध नगराउनुको कारणसहित ७ दिनभित्र लिखित जवाफ पेस गर्न आदेश दिएका हुन् ।

विष्णुपुर गाउँपालिका वडा नम्बर १ का परशुराम साहले सूचनाको हक सम्बन्धि ऐन, २०६४ को दफा ३२ बमोजिमको सजायको माग दावीसहित आयोगमा पुनरावेदन गरेका थिए ।

सूचना मागकर्ताको माग दावी ठहर भए, २५ हजारसम्म जरिवाना र विभागीय सजाय अथवा दुवै हुने व्यवस्था ऐनमा छ ।

साहले विभिन्न १४ बुँदे सूचना नगरपालिकासँग माग गरेका थिए ।

पेशाले शिक्षक रहेका साहलाई शिक्षकले सूचना माग गर्न नपाउने भन्दै नगरपालिकाका प्रमुख प्रशासकीय अधिकृत बलिराम यादवले उनलाई उल्टै सारश्वरनाथ माध्यमिक विद्यालयबाट माध्यमिक विद्यालय लगडी गदीयानीमा काज सरुवा गरेका थिए ।

साहलाई सूचनाका लागि दिएको निवेदन फिर्ता लिन दवावसमेत दिएका थिए ।

काज सरुवा गरिएका विद्यालय साहको घरदेखि लगभग १४ किलोमिटरको दुरीमा रहेको छ ।

शिक्षक शारीरिक अपाङ्गता भएका व्यक्ति हुन् । साहलाई माग गरेको सूचना दिनुको सट्टा उल्टै विद्यालयबाट अन्यत्र सरुवा गरेको र विद्यालय जानमा रोक लगाएको भन्दै उनले उजुरी गरेका थिए ।

आयोगले सोही उजुरीमाथि सुनुवाइ गर्दै पालिकालाई सात दिनभित्र लिखित जवाफ पेस गर्न आदेश दिएको हो ।