बेपत्ता तारा एयरको विमानमा ७ जना धनुषाको एउटै परिवारका

टुडेपाटी-
जनकपुरधाम, जेठ १५ गते ।

बेपत्ता तारा एयरको विमानमा धनुषा जिल्लाको एकै परिवारका सातजना रहेको खुलेको छ ।

पोखराबाट जोमसोमका लागि उडेको तारा एयरको विमानमा धनुषाको मिथिला नगरपालिका वडा नं. ११ तुल्सी पाटोका एकै परिवारका सातजना रहेको पुष्टि भएको हो ।

स्थानीय राजन कुमार गोले, उनका बुबा इन्द्रबहादुर गोले, आमा राममाया तामाङ, काका पुरुषोत्तम गोले, काकी तुलसादेवी तामाङ, मामा मकरबहादुर तामाङ र माइजु सुकुमाया तामाङ रहेको परिवारजनले बताएको छ ।

उनीहरु मुक्तिनाथ दर्शनका लागि विमानबाट जोमसोम जाँदै थिए। विमान बेपत्ता भएपछि उनीहरुको घरमा रुवाबासी चलेको छ ।

तारा एयरका अनुसार उक्त विमानमा चालक दलका तीन सदस्यसहित २२ जना यात्रुहरू सवार थिए।

बेपत्ता विमान दुर्घटना भएको आशंका गरिएको छ । सरकारी अधिकारी तथा नेपाली सेनाको हेलिकप्टरले दिनभर खोजविन गरेपनि आज पत्ता लाग्न सकेन ।