उपेन्द्र यादवलाई ठूलो धक्का : उनकै क्षेत्रमा पर्ने तीन पालिकामा जसपा पराजित

टुडेपाटी-
सप्तरी, जेठ ७ गते ।

जनता समाजवादी पार्टी (जसपा) का केन्द्रीय अध्यक्ष उपेन्द्र यादवको निर्वाचन क्षेत्रमा जसपलाई ठूलो क्षति बेहोर्नु परेको छ ।

पार्टीका अध्यक्ष उपेन्द्र यादवले जितेको क्षेत्र सप्तरी क्षेत्र नम्बर २ मा पर्ने चार पालिका मध्ये तीनवटा पालिकामा जसपा पराजित भएको हो ।

सदरमुकाम राजविराजसहित महादेवा, तिलाठी कोइलाडी र छिन्नमस्ता गाउँपालिका गरी ४ वटा पालिका पर्ने यादवको क्षेत्रमा राजविराजबाहेक कुनै तीनवटै पालिकामा जसपा हारेको छ ।

राजविराजमा जसपाका भीमराज यादव प्रमुखमा निर्वाचित भएका छन् ।

तिलाठी कोइलाडी गाउँपालिकाको अध्यक्ष र उपाध्यक्ष दुबै पदमा कांग्रेस, महादेवाको अध्यक्ष र उपाध्यक्ष दुबै पदमा लोकतान्त्रिक समाजवादी पार्टी (लोसपा) विजयी भएको छ

। छिन्नमस्तामा पनि अत्यधिक मतका साथ लोसपाका उम्मेदवारले अग्रता लिएका छन् । यहाँ दोस्रो नम्बरमा नेकपा माओवादी केन्द्रका उम्मेदवार छन् ।