धनुषामा एमाले बैठकमा विवाद, रघुवीर महासेठलाई हुलहुज्जत

टुडेपाटी-
जनकपुरधाम, बैशाख १८ गते ।

मिथिला नगरपालिकामा नेकपा एमाले भित्र विवाद भएको छ ।
आइतबार लालगढ स्थित पुकार होटेलमा बसेको चुनाव परिचालन मुल कमिटीको बैठकमा अचानक एमाले केन्द्रीय सचिव रघुवीर महासेठ पुगेपछि विवाद भएको हो ।

नेता महासेठ पुगेपछि निवर्तमान मेयर हरिनारायण महतो पक्षका असन्तुष्ट कार्यकर्ता चर्को विरोध गर्दै कालोमोसो दल्नेसम्मको हुलहुज्जत गरेपछि विवाद भएको बैठकमा सहभागी एक नेताले बताए ।

विवादमा हातहालाहालको अवस्था सृजना भएपछि बैठक स्थगित गरिएको छ । बाहिरबाट हरिनारायण पक्षको समर्थकहरु पुगेपछि सो स्थलमा तनाव सृजना भएको थियो । इलाका प्रहरी कार्यालय ढल्केबरबाट प्रहरी सो स्थलमा पुगेको थियो ।

‘टिकटमा चलखेल गर्ने रघुवीर महासेठ किन कमिटीको बैठकमा आए, कालोमोसो गर्नु पर्छ लगायतका गालीफजिती गर्न थालेपछि विवाद भयो । हात हालाहालको अवस्था सृजना भएपछि बैठक स्थगित भयो’ ती नेताले भने ।

एमाले नगर कमिटी, प्रदेश क्षेत्रले मेयर पदको उम्मेदवारका लागि हरिनारायणको एकल सिफारिस गरेको थियो । तर हिरनारायनलाई पाखा लगाएर मनोनयन दर्ताको अन्तिम दिन टिक राजाराम महतोलाई एमालेले दिएको थियो ।

हरिनारायणले स्वतन्त्र उम्मेदवारी दर्ता गराएका थिए । पछि केपी शर्मा ओलीले व्यवस्थापन गर्ने आश्वासन दिएपछि उनले शुक्रबार उम्मेदवारी फिर्ता लिएका थिए ।

हरिनारायणको भएको सिफारिस निर्णयलाई राजारामको नाम राखेर पुरानै मितिमा निर्णय गर्न खोजेपछि विवाद भएको नगर कमिटी सदस्य कामेश्वर महतोले बताए ।

चुनावको तयारीका लागि रामकुमार महतोको संयोजकत्वमा एमालेले मिथिला नगरपालिकामा ५०१ सदस्य चुनाव परिचालन मुल समिति गठन गरिसकेको छ ।

विवाद स्थलमा हरिनारायण समेत पुगेका थिए ।