अब ३६५ दिनमा १५६ दिन सार्वजनिक बिदा, मधेश प्रदेशमा १५९ दिन

टुडेपाटी-
जनकपुरधाम, बैशाख १५ गते ।

सरकारले आइतबार पनि विदा दिने निर्णय गरेसँगै अब वर्षको ३६५ दिनमध्ये १५६ दिन सार्वजनिक बिदा हुने भएको छ ।
अब वर्षमा करिब २१० दिन मात्रै सरकारी कार्यालय खुल्ने भएको छन् ।

वर्षमा करिब ५२ दिन हुँदै आएको साप्ताहिक बिदा अब करिब १०४ दिन पुग्नेछ ।

त्यसबाहेक सरकारले दिने विभिन्न धर्म, समुदाय, क्षेत्रमा दिने सार्वजनिक बिदासमेत जोड्दा करिब १५६ भन्दा बढी बिदा पुग्छ ।

सरकारले कार्य घण्टा बढाएर क्षतिपूर्ति गर्न खोजेपनि पनि कार्यालय बन्द हुने दिन ठूलो मात्रामा बढेको छ ।

संघीय सरकारले देशभर सबैलाई लागू हुने गरी घोषणा गरेको विदाको संख्या मात्रै ३३ छ । सरकारले प्रकाशित गरेको राजपत्र अनुसार २०७९ मा मुलकुभरि १५ दिन पर्व बिदा तोकेको छ । यसमाथि दशैंका लागि ६ दिन र तिहारका लागि ५ दिन विदा दिइएको छ ।

विश्व मजदुर दिवस, गणतन्त्र दिवस, संविधान दिवस, राष्ट्रिय प्रजातन्त्र दिवस र महिला दिवस गरी पाँच कार्य दिनमा पनि सबैतिर विदा हुन्छ । बुद्ध जयन्तीमा पनि सबैका लागि सार्वजनिक विदा हुन्छ । राष्ट्रिय एकता दिवसमा कतिपय सरकारले सार्वजनिक विदा समेत घोषणा गर्ने गरेको छ ।

विदा नदिइएपनि निजामती दिवस, सहीद दिवस र राष्ट्रिय छुवाछुतविरुद्धको दिवस पनि देशव्यापी रुपमा मनाइने गरी तोकिएको छ ।

धर्म, समुदाय र ठाउँ विशेष पनि ठूलो संख्यामा विदा दिइन्छ । प्रदेश सरकारहरुले सम्बन्धित प्रदेशमा दिनसक्ने ६ दिनको विदालाई जोड्ने हो भने वर्षमा त्यस्तो विदा १९ वटा पुग्छ ।

तराई र पहाडका लागि फागु पूणिर्मामा छुट्टा(छुट्टै दिन विदा दिइएको छ । नेवार समुदायको गाईजात्रा, गौरा पर्व, मोहम्मद जयन्ती, सरुवा पावनीको दिनमा समुदाय विशेष विदा छ । महिलाहरुका लागि तीज र जितिया पर्वको विदा छ । शिक्षण संस्थाका लागि वसन्त पञ्चमीमा विदा हुन्छ ।

काठमाडौंमा गाईजात्रा, इन्द्रजात्रा, मत्स्यन्द्रनाथको भोटो देखाउने जात्रा, घोडे जात्रामा विदा छ ।

अपांगता भएकाहरुका लागि पनि अन्तर्राष्ट्रिय अपांग दिवसवमा विदा दिइन्छ । फाल्गुनानन्द जयन्ती, र गुरु नानकको जन्म जयन्तीका दिन सम्बन्धित धर्मावलम्बीले विदा पाउँछन् ।

प्रदेशहरुले घोषणा गर्नसक्ने थप ६ दिनको विदा पनि संघयि सरकार अन्तरगतका कार्यालयमा लागू हुन्छ ।

संघीय सरकारका विदा अतिरिक्त मधेश प्रदेश सरकारले ९ दिन बिदा छुट्याएको छ ।

यसरी मधेश प्रदेशको हकमा जोड्दा १५९ दिन सार्वजनिक बिदा हुन जान्छ ।

मधेश प्रदेश : नयाँ वर्ष २०७९ मा ११ दिन सार्वजनिक विदा, कुन-कुन दिन ?