मधेश प्रदेशमा पाँचदलीय गठबन्धनबीच यस्तो भयो चुनावी तालमेल !

टुडेपाटी-
जनकपुरधाम, चैत २९ गते ।

आगामी वैशाख ३० गते तय गरिएको स्थानीय तहको निर्वाचनमा पाँच दलीय गठबन्धनले मधेश प्रदेशमा आवश्यकताको आधारमा गठबन्धन गर्ने सहमति गरेको छ ।

मंगलबार महोत्तरीको बर्दिबासमा प्रदेश कार्यदलको बैठकमा यस्तो सहमति
भएको हो ।

सत्तारूढ दलहरू आफैं बलियो र आफै भित्र प्रतिस्पर्धा हुने ठाउँमा चुनावी तालमेल नगर्ने र विपक्षी दल बलियो भएको ठाउँमा तालमेल गरेर जाने निर्णय भएको जनता समाजवादी पार्टी (जसपा) का प्रदेश अध्यक्ष रामबाबु यादवले जानकारी दिए।

उनका अनुसार यो सहमति पालिकास्तरमा मात्र लागु हुने छ भने वडाहरुमा हुने छैनछ।

‘वडामा गठबन्धन जरूरी छैन आ(अफ्ना हिसाबले लड्न पाउनेछ तर पालिकास्तरमा गठबन्धन भए प्रमुख र उपप्रमुखमा गठबन्धनलाई नै सबै दलले मत दिनुपर्ने सहमति भयो,’ उनले थपे।

गठबन्धन हुने पालिकामा प्रमुखमा जितेकै दलको दाबी रहने उनले जानकारी दिए । यद्यपि जसपा र लोसपाका पालिका प्रमुख भएको ठाउँमा जसपाको दाबेदारी हुने र नेकपा एकीकृत समाजवादी र एमाले जितेका ठाउँमा समाजवादीको दाबेदारी हुनेछ।

पालिकास्तरमा दलहरूको स्थितिबारे रिपोर्ट लिन प्रदेश कार्यदलले वैशाख ३ गतेसम्म जिल्ला–जिल्लामा पुग्ने कार्यक्रम छ।

पाँच वटै दलका जिल्ला अध्यक्षहरूसँग छलफल गर्ने र गठबन्धनको आवश्यकता र मनसाय बुझ्ने कार्य हुने नेपाली कांग्रेसका प्रदेश कोषाध्यक्ष प्रदीप यादवले बताए।

उनका अनुसार प्रदेशस्तरको कार्यदल र सत्ता गठबन्धनका जिल्ला अध्यक्षहरूसँग कुन ठाउँमा गठबन्धन गर्नेरनगर्ने अन्तिम निर्णय गर्न वैशाख ४ र ५ गते बैठक बस्नेछ।

चार जिल्लाका एक दिन र चार जिल्लाको अर्को दिन बैठक बसेर आवश्यक स्थानमा गठबन्धनबारे अन्तिम निर्णय हुने कोषाध्यक्ष यादवले जानकारी दिए। यद्यपि उपमहानगरपालिका र महानगरपालिकामा गठबन्धनबारे केन्द्रले नै निर्णय गर्नेछ।