बिहार : ६० फिट लामो फलामे पुल चोरी

एजेन्सी–
पटना चैत २७ गते ।

छिमेकी राष्ट्र भारतमा फलामको पुल नै चोरी भएको घटना बाहिरिएको छ ।

भारतको बिहार राज्यको रोहतास जिल्लाको विक्रमगञ्ज उपखण्ड क्षेत्रमा रहेको ६० फिट लामो पुल शुक्रबार चोरी भएको भारतीय सञ्चार माध्यम हिन्दुस्तान टाइम्सले जनाएको छ।

शुक्रबार दिउँसो चोरहरूले सिँचाइ विभागको अधिकृत भनेर स्थानीय सरकारी कर्मचारीको सहयोगमा पुल चोरी गरेका हुन्।

स्थानीय प्रहरीका अनुसार चोरहरूले पिकअप भ्यान, ग्यास कटर, जेसिबी र सवारी साधन लिएर आएका थिए । उनीहरूले पूरै पुल काट्न तीन दिन लगाएको र काटेपछि उनीहरू बेपत्ता भएको जनाएको छ।

त्यस्तै भारतीय सञ्चार माध्यम एएनआईका अनुसार चोरहरू अधिकृत भन्दै पुल मर्मत गर्न भनेर गएका थिए । सोही क्रममा उनीहरू उपकरणको सहायताले पूर्ण रूपमा पुल उखलेको राज्य सिँचाइ विभागका जुनियर इन्जिनियर अरशद कमल शम्शीले बताए।

नसरीगञ्ज पुलिस स्टेसनमा सिँचाइ विभागका अधिकारीहरूले रिपोर्ट दर्ता गरेका छन्।

६० फिट लम्बाइ र १२ फिट उचाइ रहेको पुल एक्कासि हराएपछि त्यस क्षेत्रका मानिसहरू स्तब्ध भएका छन्।

सन १९७२ मायो पुल अमियावर गाउँको आरा नहरमाथि बनेको थियो।