गभर्नरलाई निलम्बन गरिएकोमा एमाले अध्यक्ष ओलीको आपति

टुडेपाटी–
काठमाडौं, चैत २६ गते ।

नेपाल राष्ट्र बैँकका गभर्नर महाप्रसाद अधिकारीलाई निलम्बन गरेकोमा नेकपा एमालेका अध्यक्ष केपी शर्मा ओलीले आपति जनाएका छन् ।

अध्यक्ष ओलीले देश निर्लज्ज व्यक्तिहरूको हातमा परेको भन्दै विरोध गरेका हुन् ।

शनिवार राजधानीमा आयोजित एक कार्यक्रममा बोल्दै पूर्व प्रधानमन्त्री समेत रहेका ओलीले अर्थतन्त्र जोगाउनका लागि केही प्रयास गर्दागर्दै अधिकारीलाई निलम्बन गरिएको बताए।

उनले भने, ‘राष्ट्र बैंकको डेपुटी गभर्नर भएको, अर्थतन्त्र बुझेको मान्छे अर्थतन्त्र जोगाउन खोज्दाखोज्दै निलम्बनमा परेको छ । धान खाने मुसो चोट पाउने भ्यागुतो भएको छ।’

माओवादीले नियुक्त गरेका न्यायाधीशको नेतृत्वमा छानबिन गर्न समिति गठन गरिएको भन्दै ओलीले आपत्ति जनाए।

उनले भने, ‘हामीलाई थाहा छ न्यायालय कस्तो छ भन्ने ।’

नियुक्तिहरूमा पनि नातावाद र कृपावाद चलेको ओलीले आरोप लगाए । उनले देशमा नातावाद कृपावादको बहस चलिरहेका बेला माओवादी केन्द्रका अध्यक्षका भाइ नारायणप्रसाद दाहाललाई राष्ट्रिय सभा सदस्य नियुक्ति गरिएको बताए।