काठमाडौंबाट जनकपुरका लागि उडेको बुद्ध एयरको जहाजको इन्जिन खराब भएपछि …

टुडेपाटी-
जनकपुरधाम, चैत २४ गते ।

काठमाडौंबाट जनकपुर उडेको बुद्ध एयरको जहाज बिहीबार अवतरण नै नगरी काठमाडौं फर्किएको छ।

बिहीबार दिउँसो २ः१० मा काठमाडौंबाट जनकपुर उडान गरेको जहाज बिचबाटो बाटै काठमाडौं फर्किएको हो।

एयरहोस्टेजले जहाजको इन्जिनमा केहि प्राविधिक समस्या भएको कारण पुनः काठमाडौं नै फर्किन लागेको भनेपछि यात्रुहरु अतालिएका थिए ।

इन्जिनमा समस्या भएपछि आकाशबाटै फर्किएर काठमाडौंमा अवतरण भएको एक यात्रुले बताए।

उनका अनुसार यात्रुहरु आतंकित भएका थिए । काठमाडौंमा जहाज सुरक्षित अवतरण भएको बताइएको छ।

यता बुद्ध एयर जनकपुरका प्रमुख विजय सिंहले बाटोमै मौसममा खराबी आएको कारण फर्किएको बताए ।

यात्रीहरुलाई प्राविधिक जानकारीको कमीले इन्जिन खराब भएको विषय भनेको हुन सक्ने उनले बताए ।

काठमाडौं अवतरण गरेपछि अर्को जहाजले यात्रुलाई फेरि जनकपुर ल्याएको थियो ।