जनकपुरबाट अपहरित बालिका २४ घण्टा भित्रै अपहरणमुक्त, पाँच जना पक्राउ

टुडेपाटी-
जनकपुरधा, चैत ११ गते ।

धनुषामा अपहरणमा परेकी ४ वर्षीया बालिकालाई धनुषा प्रहरीले २४ घण्टा भित्रै अपहरण मुक्त गराउन सफल भएको छ ।

अपहरणमा संलग्न ५जनालाई प्रहरीले पक्राउ समेत गरेको छ ।

शुक्रबार साँझ विदेह नगरपालिका ८ बफैयबाट बालिकाको उद्धार गरी घटनामा संलग्नको आरोपमा पाँच जनालाई धनुषा प्रहरीले पक्राउ गरेको हो ।

बिहीबार साँझ जनकपुरधाम उपमहानगरपालिका–१६ पुलचौकबाट ध्रुव मण्डलकी चार वर्षीया छोरी अपहरणमा परेकी थिइन् ।

उनको अपहरण आरोपमा कमला नगरपालिका ८ का गंगाप्रसाद दासका छोरा अभिषेक दासलेसहित पाँच जना पक्राउ परेको धनुषाका प्रहरी नायव उपरीक्षक जितेन्द्र बस्नेतले जानकारी दिए ।

उनकाअनुसार बालिकाको बुवा जनकपुर पुलचोकस्थित डेरा गरी पूरा परिवार सँगै बस्दै आएका छन् ।

सोही घरमा भाडा लिएर बस्दै गरेका अभिषेक दासले बालिका विद्यालयबाट आएपछि अपहरण गरी लगेको अनुसन्धानबाट खुलेको प्रहरीले जनाएको छ । उनले बालिकाको परिवारसँग १५ लाख मागेको प्रहरीले जनाएको छ ।

बालिकाको मेडिकल जाँचपछि आजै परिवारलाई जिम्मा लगाउने प्रहरीको तयारी छ ।