रुसविरुद्ध संसारभरका मानिसलाई सडकमा उत्रिन युक्रेनका राष्ट्रपति जेलेन्स्कीको अपिल

एजेन्सी-
जनकपुरधाम, चैत १० गते ।

रुसले आफ्नो देशमा अतिक्रमण गरेको एक महिना पुगेको दिनमा युक्रेनका राष्ट्रपति भोलोदिमिर जेलेन्स्कीले संसारभरिका मानिसहरूलाई अपिल गर्दै सडकमा उत्रिएर उनको देशप्रति समर्थन जनाउन अग्रह गरेका छन् ।

रुसले स्वतन्त्रताविरुद्ध युद्ध छेडेको उनले बताएका छन्।

आफ्नो दैनिक सम्बोधनका क्रममा केही बेर अङ्ग्रेजीमा बोल्दै उनले मानिसहरूलाई युक्रेनी प्रतीक लिएर आउन भनेका छन्।

उनले भने, ‘तपाइँहरू आफ्ना सहरका चोक तथा सडकमा आउनुस्। देखिनुस् र सुनिनुस्। मानिसको जीवनको महत्त्व छ, स्वतन्त्रताको महत्त्व छ, शान्तिको महत्त्व छ अनि युक्रेनको महत्त्व छ भनेर बोल्नुस्।’

‘मार्च २४ मा युद्ध रोक्न चाहने सबैजना एकत्रित हुनुस्।’ उनले भने । उनले युक्रेनमा रुसले स्वतन्त्रताविरुद्ध युद्ध छेडिरहेको पनि बताए।

रुसको निर्मम र मुढे बललाई संसारले रोक्नुपर्ने उनले बताए।

रुसले आक्रमण गरेको एक महिना बितिसकेको र यसबीच आफ्नो, सबै युक्रेनी जनताको अनि यस धरतीका सबै स्वतन्त्र मानिसको मुटु चुँडिएको उनले उल्लेख गरे।