आफ्नै श्रीमतीको हत्या गरेर फरार सिरहाका यादव ६ वर्षपछि कतारबाट पक्राउ, नेपाल ल्याइयो

टुडेपाटी-
जनकपुरधाम, फागुन २४ गते ।

आफ्नै श्रीमतीको हत्या गरी विदेश गएका सिरहाका एक व्यक्ति पक्राउ परेका छन् ।

श्रीमतीको हत्या गरेर कतार गएका सिरहा विष्णुपुर गाउँपालिका–५ लक्ष्मीपुर ठेगाना भएका ४१ वर्षीय विक्की मुस्कान भन्ने भोगेन्द्र प्रसाद यादव ६ वर्षपछि पक्राउ परेका हुन् ।

इन्टरपोलबाट रेड नोटिस जारी भएका यादवलाई कतारबाट पक्राउ गरी सोमबार नेपाल ल्याइएको छ।

ललितपुर लेलेमा २०७२ वैशाख १५ गते बिहान उनको २५ वर्षीया श्रीमती आरतीको हत्या गरिएको अवस्थामा शव फेला परेको थियो।

घटनाको अनुसन्धाबाट यादवले नै आरतीको धारिलो हतियारले घाँटी रेटी हत्या गरेको खुलेको थियो ।
घटना पश्चात यादव फरार भएका थिए ।

फरार रहेका उनलाई कतारमा पक्राउ परेपश्चात प्रहरी प्रधान कार्यालय इन्टरपोल शाखाले इन्टरपोल दोहा कतारसँग समन्वय गरी नेपाल ल्याई त्रिभुवन अन्तर्राष्ट्रिय विमानस्थलबाट नियन्त्रणमा लिएको हो।

घटनापश्चात वैदेशिक रोजगारीको सिलसिलामा कतार गएका भोगेन्द्रविरुद्ध अन्तर्राष्ट्रियस्तरमा खोजतलास एवम् पक्राउको लागि महानगरीय अपराध महाशाखाको अनुरोधमा २०७६ पुस १२ गते इन्टरपोल महासचिवालयबाट डिफ्यूजन तथा पुनः २०७७ साउन १९ गते रेड नोटिस जारी गरिएको थियो।

यादवलाई थप अनुसन्धान तथा आवश्यक कानुनी कारबाहीका लागि महानगरीय अपराध महाशाखामा बुझाइएको इन्टरपोल शाखाले जनाएको छ।