बिहीबार संसदमा अनिवार्य उपस्थित हुन कांग्रेस सांसदलाई निर्देशन

टुडेपाटी–
काठमाडौँ, फागुन ११ गते ।

नेपाली कांग्रेसले बिहीबार बस्ने प्रतिनिधिसभा बैठकमा उपस्थित हुन आफ्नो दलका सबै सांसदलाई निर्देशन दिएको छ।

कांग्रेस संसदीय दलकी सचेतक पुष्पा भुसालले पार्टीका सबै सांसदलाई प्रतिनिधिसभा बैठकमा अनिवार्य उपस्थित हुन सर्कुलर जारी गरिएको जानकारी दिइन् ।

संसद बैठकमा अमेरिकी सहयोग परियोजना एमसीसीमाथि सैद्धान्तिक छलफल हुने र उक्त छलफल नै निर्णायक बन्न सक्ने भएकाले सांसदलाई अनिवार्य उपस्थित हुन भनिएको उनले बताइन् ।

भुसालले भनिन, ‘सैद्धान्तिक छलफल र निर्णय प्रक्रिया जोडिएको हुन्छ। तसर्थ यसलाई एमसीसीको पक्षमा उभिन सांसदलाई ह्विप नै जारी गरिएको भनेर बुझ्दा पनि हुन्छ ।’

हाल प्रतिनिधिसभा नेपाली कांग्रेसका ६३ जना सांसद छन् । तीमध्ये दुईजना निलम्बित छन् भने सांसद प्रदीप गिरी उपचारका क्रममा भारतमा छन् ।