युएईसँग पराजित भएसँगै टी–२० विश्वकप खेल्ने नेपालको सपना टुट्यो

टुडेपाटी–
काठमाडौँ, फागुन १० गते ।

टी–२० विश्वकप छनोट अन्तर्गतको सेमिफाइनल म्याच हारेसँगै अष्ट्रेलियामा हुने टी–२० विश्वकप खेल्ने नेपालको सपना टुटेको छ ।

मंगलबार भएको सेमिफाइनलमा नेपाल युएईसँग ६८ रनले पराजित भएसँगै नेपालको विश्वकप खेल्ने सपना अधुरै रहेको हो।

ओमानको अल अमेरात क्रिकेट मैदानमा टस जितेर पहिले व्याटिङ गरेको युएईले निर्धारित २० ओभरमा ७ विकेटको क्षतिमा १७५ रन बनाएको थियो।

जवाफी व्याटिङ थालेको नेपालले १८ ओभर चार बलमा अलआउट हुँदै १०७ रन मात्रै बनाउन सक्यो।
नेपालका दीपेन्द्र सिंह ऐरीले ३८, ज्ञानेन्द्र मल्लले २० र आरिफ शेखले ११ रन बनाए पनि अन्य कुनैपनि व्याट्सम्यानले दोहोरो अंकको रन जोड्न सकेनन्।

युएई सेमिफाइनल म्याच जितेसँगै अष्ट्रेलियामा हुने विश्वकपका लागि छनोट भएको छ ।