१८ वर्षमाथिका सबैलाई बुस्टर डोज दिइने

टुडेपाटी-
जनकपुरधाम, माघ २८ गते ।

सरकारले १८ वर्षमाथिका सबैलाई कोरोना भाइरसविरुद्धको बुस्टर डोज दिने भएको छ ।

कोरोना भाइरसविरुद्धको पूरा मात्रा खोप लगाएको ६ महिना भएका १८ वर्ष माथिका सबैलाई बुस्टर डोज लगाइने स्वास्थ्य तथा जनसंख्या मन्त्रालयले जनाएको छ ।

१८ वर्ष माथिकालाई बुस्टरको कोभिशिल्ड, एस्ट्राजेनेका, मोडर्ना वा फाइजर खोप दिने निर्णय गरेको मन्त्रालयका जनस्वास्थ्य अधिकृत सञ्जयकुमार महासेठले बताए ।

उनले सबै ७७ जिल्लाका स्वास्थ्य कार्यालयलाई पत्र लेखी बुस्टर डोज खोप दिन आग्रह गरेका छन् ।

बुस्टर डोज खोप दिँदा अग्रपंक्तिमा खटिनेहरु, ६० वर्षमाथिका ज्येष्ठ नागरिक, दीर्घरोगी, गर्भवती र सामाजिक जनसांख्यिक रुपमा पछाडि पारिएका व्यक्तिहरुलाई प्राथिमकता दिन भनिएको छ ।

स्वास्थ्य मन्त्रालयले कोभिड–१९ संक्रमण भएका व्यक्तिलाई संक्रमणमुक्त भएको एक महिनापछि कोरोना भाइरसविरुद्धको खोप र बुस्टर डोज दिन मिल्ने पनि बताएको छ ।