विमानस्थलबाट एक करोडको अवैध सुन सहित मधेशका एकसहित तीन जना पक्राउ

टुडेपाटी–
काठमाडौं, माघ २० गते ।

प्रहरीले त्रिभुवन विमानस्थलबाट करिब एक करोड रुपैयाँ बराबरको अवैध सुन र मोबाइल सहित तीनजनालाई पक्राउ गरेका छन् ।

प्रहरीले ९९ लाख २९ हजार ६९८ रुपैयाँ मूल्य पर्ने १ किलो १५० ग्राम सुन र ५ थान मोबाइल बरामद गरेको जनाएको छ ।

प्रहरीले पक्राउ गरेका तीनजना मध्ये दुईजना दुबई र एक जना साउदी अरबबाट आएका हुन् ।

हिमालय एयरलाइन्सको जहाजबाट दुवईबाट आएका रौतहटको गौर नगरपालिका वडा नं. १० सोबगाढाका ३२ वर्षीय सुनिल कुमार साहको साथबाट चार थान आईफोन, एक थान सुनको बेरुवा औँठी र १५० ग्रामका सुनको सिक्री प्रहरीले बरामद गरेको छ।

यस्तै, मकवानपुरको मनहरी–७ का २८ वर्षीय नवराज परियारको साथबाट आईफोन १ थान र सुनको बेरुवा औंठी– २ बरामद गरेको छ ।

सारजहाबाट एयर अरेबियाबाट आएका सिन्धुपाल्चोकको भोटेकोशी गाउँपालिका–३ का ३९ वर्षीय दावा छिरिङ शेर्पाको साथबाट बेलनाकार बनाइएको अर्धठोस सुन तीन थान १०५५ ग्राम मलद्वारभित्र लुकाएको अवस्थामा फेला परेको प्रहरीले जनाएको छ।

तीनै जनालाई थप अनुसन्धानका लागि त्रिभुवन विमानस्थल भन्सार कार्यालय, गौचर बुझाइएको छ।