मन्त्री यादवको हिंसा भड्काउने अभिव्यक्ति ‘पुनः गौर नरसंहार हुन्छ,घेरा हालेर तपाईको हत्या हुन्छ’

टुडेपाटी-
जनकपुरधाम, माघ ६ गते ।

भौतिक पूर्वाधार तथा यातायात मन्त्री रेणु यादवले हिंसा भड्काउने विवादित अभिव्यक्ति दिएकी छन् ।

बलिदानी दिवसको अवसरमा बुधबार गौरमा जनता समाजवादी पार्टी (जसपा) आयोजना गरेको गरेको कार्यक्रमलाई सम्बोधन गर्दै जसपा नेतृ समेत रहेकी मन्त्री यावदले पुनः गौर नरसंहार गर्ने अभिव्यक्ति दिएकी हुन् ।

पदीय मर्यादा विपरीत उनले जनमत पार्टीका अध्यक्ष सिके राउतलाई गौर काण्ड भएकै राइस मिलमा घेरेर हत्या गर्नेसम्मको चेतावनी दिइन् ।

‘गौर नरसंहारको इतिहास राइस मिल जिवीतै छ । गौरमा फठा देखाउने प्रयास नगर । यहाँ लाठी भाँज्न मानिसले जानेका छन् । तुफानसंग टकराउने प्रयास नगर,’हिन्दी भाषमा भाषण गर्दै फिल्मी शैलीमा उनले चेतावनी दिँदै भनिन ‘तुफानसंग टकराउने प्रयास गर्यो भने त्यहि हालत हुन्छ । जुन गौरको राइस मिलमा भएको थियो । त्यो इतिहासलाई तपाई नभुल्नुस् । नत्र तपाइको कार्यकर्ता मारिन्छ र तपाइलाई पनि घेराबन्दी गरेर मारिदिन्छ । हत्या हुन्छ । सतर्क रहनुस्’

मन्त्री यादव बुधबार गौरमा कार्यक्रममा सहभागि हुन पुगेका बेला जनमत पार्टीका कार्यकर्ताहरुले किसानको समस्या समाधान गर भन्दै नाराजुलुस गरेका थिए । उनीहरुले मन्त्री यादवलाई कार्यक्रम स्थल जान पनि अवरोध गरेका थिए ।

सुरक्षा घेरामा कार्यक्रम स्थल पुगेका मन्त्री यादवले सम्बोधन गर्दै यस्तो अभिव्यक्ति दिएकी हुन् । उनले बलिदानी दिवस भएकै कारण आजको नरसंहार रोकेको संकेत समेत गरिन् ।

‘फठा भाँज्ने प्रयास नगर । गौरका मानिसले लाठी भाँज्न राम्ररी जानेका छन् । यो फठालाई तोडफोड गरेर घरमा राखिदिन्छन् । हामीले आज रोकि दियौं । आज बलिदानी दिवसको दिनमा हिंसा गर्नु हुँदैन भनेर ‘ मन्त्री यादवले भनिन् ।

७ चैत २०६३ चैतको दिन गौरको राइस मिलमा तत्कालीन माओवादी समर्थित मधेसी राष्ट्रिय मुक्ति मोर्चा र उपेन्द्र यादवले नेतृत्व गरेको तत्कालीन मधेसी जनअधिकार फोरम एकै स्थानमा छुट्टा छुट्टै मञ्च बनाएर कार्यक्रम गरेका थिए । सोही कार्यक्रम गर्ने विषयमा विवाद हुँदा भएको झडपमा २७ जनाको मृत्यु भएको घटनालाई गौर नरसंहार भनेर चिनिन्छ।

उक्त घटनामा तत्कालीन माओवादीका २७ जना कार्यकर्ताको हत्या भएको थियो ।