रेलको खेल : महाप्रबन्धकले आफ्ना नजिकका व्यक्तिलाई नियुक्त गरेर तालिम दिन थाल्दा पूरानाहरु आन्दोलित

टुडेपाटी–
जनकपुरधाम, पुस २८ गते ।

नेपाल रेल्वे सञ्चालन नहुँदै विवादमा तानिएको छ । नेपाल रेल्वे सञ्चालन नहुँदै विवादमा तानिएको छ ।

रेल्वे सञ्चालनका लागि नेपाल रेल्वे कम्पनी लिमिटेडले ज्यालादारीमा नियुक्त गरेका कर्मचारीलाई तालिन दिन खोज्दा यस अघि तालिम लिएकाहरुले आन्दोलन थालेका छन् ।

नेपाल रेल्वे कम्पनीका तत्कालिन महाप्रबन्धक गुरु भट्टराईले ज्यालादारीमा काममा खटाउने भनिएका १५१ जना कर्मचारीलाई बिना कुनै जानकारी हालका महाप्रबन्धक निरञ्जन झाले हटाएर नयाँलाई नियुक्त गरी तालिम दिन थालिएपछि पूरानाहरु आन्दोलित भएका छन् ।

पूराना कर्मचारीलाई हटाएर महाप्रबन्धक झाले नयाँ ५५ जनालाई नियूक्त गरी आजदेखि जनकपुरधाममा तालिम दिन थालिएपछि उनीहरुले तालिमस्थलमै गएर विरोध जनाएका हुन् ।

नेपाल रेल्वेलाई कानूनी तथा प्राविधिक कारण देखाई जयनगर–कुर्था खण्डमा नियुक्त भएका कर्मचारीहरुलाई एक्कासी सूचना निकालेर नवनियुक्त महाप्रवन्धकले हटाएपछि उनीहरुले आफूहरुलाई पूनः समायोजन गर्न माग गरेका छन् ।

सहायक स्टेशन मास्टरको तालिम लिएका इन्द्रजित गोइतले आफूहरुलाई कुनै जानकारी नै नदिई नवनियूक्त महाप्रबन्धक झाले आफूअनुकूलका पार्टीका नयाँ कार्यकर्ताहरुलाई नियूक्त गरी तालिम दिन लागेको आरोप लगाए । गोप्यरुपमा तालिम दिएर आफ्ना नजिकका व्यक्तिहरुलाई राख्नु आफूहरुका लागि असहय रहेको उनले भने । गोइतले आफूहरुले एक महिनाको तालिम लिएको र आफूहरुको भुक्तानी समेत बाँकी रहेको बताए ।

पूराना कर्मचारीमध्येका सतिश ठाकुरले १५१ जना पूराना कर्मचारीले तालिम लिइसकेकोले आफूहरुलाई समायोजन गर्नुपर्ने माग गरेका छन् ।
त्यस्तै, सहायक स्टेशन मास्टर पदमा २०५८ सालदेखि नै कार्यरत रहेका मञ्जय कुमार गोइतले पूराना जनशक्तिलाई हटाएर नयाँलाई नियूक्त गरी तालिम सञ्चालन गर्नु महाप्रबन्धक झाको मनोमानी रहेको बताए । उनले पूराना कर्मचारीलाई समायोजन गरी उनीहरुको पनि व्यवस्थापन गर्नुपर्ने माग गरेका छन् । उनले पूरानो तालिममा सरकारको ८८ लाख रुपैयाँ खर्च भएको समेत बताए ।

यता महाप्रबन्धक झाले भारतस्थित केआरसिएल कम्पनीका ट्रेनरहरुमार्फत नयाँ नियूक्त गरिएका कर्मचारीलाई तालिम दिइरहेको बताए । उनले गेट म्यान, ग्याङ म्यान, ग्याङ म्यान इन्चार्ज, प्वाइन्ट म्यान, कि म्यान र स्टेशन मास्टरका लागि तालिम सञ्चालन भईरहेको बताए ।

कानूनले दिएको अधिकार प्रयोग गरेर मात्रै आफूले नयाँ कर्मचारी नियूक्त गरेको र नेपाल रेल्वे ऐनले दिएको अधिकार बमोजिम नै उनीहरुका लागि तालिम सञ्चालन गर्न लागिएको महाप्रबन्धक झाले दावी गरे ।

महाप्रबन्धक झाले गत भदौ १८ गते एक सूचना प्रकाशित गर्दै ज्यालादारीमा नियुक्त गरिएका सयौं कर्मचारीलाई हटाएका थिए ।

भारतको जयनगरदेखि जनकपुरधामको कुर्थासम्म ३४ किलोमिटर रेल लिक तयार भइसकेकाले नेपाल सरकारले गत वर्ष नै रेल सेट खरिद गरिसकेका छ । हाल सो रेल धनुषाको जनकनन्दिनी गाउँपालिकास्थित ईनर्वा स्टेशनमा सशस्त्र प्रहरीको निगरानीमा राखिएको छ ।