पर्सामा बुहारीको हत्या आरोपमा सासूससुरा सहित ३ जना पक्राउ, आधा जलेको शव नियन्त्रणमा

टुडेपाटी-

पर्सा, चैत २३ गते ।

पर्सामा बुहारीको हत्या गरेको आरोपमा सासू, ससुरा र कान्छी बुहारी पक्राउ परेका छन् । ससुरा ६० वर्षीय सुरेश पण्डित, सासू ५५ वर्षीया फूलकुमारी देवी र उनीहरुकी कान्छी बुहारी २३ वर्षीया मालती देवी पक्राउ परेकी हुन् ।

पर्साको बहुदरमाई नगरपालिका-८ रामनगरी टोल बस्ने २५ वर्षीया उर्मीला देवी पण्डितको हत्या गरेको अभियोगमा उनीहरुलाई पक्राउ गरेको ईलाका प्रहरी कार्यालय पोखरियाले जनाएको छ ।

पक्राउ परेका तीनैजनाले बुहारी उर्मिलाको हत्या गरि घाटमा लगेर दाहसंस्कार गरिरहेको अवस्थामा शनिबार राति पक्राउ गरिएको पोखरियाका प्रहरी निरीक्षक चन्द्र सिंहले जानकारी दिए ।

आधा भाग जलिसकेको अवस्थामा मृतकको शव पनि नियन्त्रणमा लिएको प्रहरी निरीक्षक सिंहको भनाइ छ । पक्राउ परेका तीनैजनालाई प्रहरी हिरासतमा राखी थप अनुसन्धान भइरहेको तथा नियन्त्रणमा लिइएको शवलाई पोष्टमार्टमको लागि नारायणी अस्पतालमा पठाईने प्रहरी निरीक्षक सिंहले बताए ।

मृतक उर्मिलाका श्रीमान् वैदेशिक रोजगारीमा छन् ।