बाबा रामदेवको टिभी च्यानल उदघाटनमा सहभागि हुन नेपाल आए भारतीय यातायात मन्त्री गडकरी

टुडेपाटी–
काठमाडौं, मंसिर २ गते ।

बाबा रामदेवको टिभी च्यानलको उद्घाटनमा सहभागि हुन भारतका केन्द्रीय यातायात मन्त्री नितिन गडकरी काठमाडौं आइपुगेका छन् । आज दिउँसो साढे ४ बजे नेपाल वायु सेवा निगमको जहाजबाट उनी काठमाडौं आएका हुन् ।

बाबा रामदेवको पतञ्जली योगपिठले शुक्रबारदेखि पतञ्जली नेपाल टिभी र आस्था नेपाल टिभीको प्रसारण गर्दै छ । बालुवाटार स्रोतका अनुसारमा शुक्रबार हुने यी टिभीको उद्घाटनमा प्रधानमन्त्री शेरबहादुर देउवा सहभागी हुनेछन् ।

उद्घाटनमा सहभागि हुन आएका मन्त्री गड्करी भारतको सत्तारूढ भारतीय जनता पार्टीका प्रभावशाली नेतामध्ये एक हुन् । सन् २०१४ मा नरेन्द्र मोदी सत्तामा आएपछि उनी केन्द्रीय मन्त्री छन् । पछिल्लो समय नेपाल आउने गडकरी उच्च भारतीय अधिकारी हुन् ।

नेपालमा रहँदा गडकरीले राजनीतिक भेटघाट गर्छन् कि गर्दैनन् भन्ने खुलिसकेको छैन। परराष्ट्र मन्त्रालयले गडकरीको भ्रमणबारे औपचारिक जानकारी पनि दिएको छैन । परराष्ट्रका अधिकारीहरूले गड्करीको काठमाडौं भ्रमण तालिकाबारे आफूहरूलाई जानकारी नभएको बताएका छन् ।

आज नेपाल आएका गडकरी शुक्रबार नयाँदिल्ली फर्किने कार्यतालिका रहेको स्रोतले जानकारी दिएको छ ।