प्रदेश २ का भौतिक पूर्वाधार विकास मन्त्रीमाथि आफ्नै पार्टीका कार्यकर्ताबात हातपातको प्रयास

टुडेपाटी-
जनकपुरधाम, मंसिर १ गते ।

प्रदेश २ का भौतिक पूर्वाधार विकास मन्त्री रामसरोज यादवमाथि आफ्नै पार्टीका नेताकार्यकर्ताले हातपातको प्रयास गरेका छन् ।

धनुषाको मुखियापट्टी मुसहरनिया गाउँपालिका ६ को वडा अधिवेशनमा हस्तक्षेप गर्न खोजेपछि नेपाली कांग्रेसका कार्यकर्ताहरूले मन्त्री यादवमाथि हातपातको प्रयास गरेका हुन् ।

मन्त्री यादवलाई उनकै वडामा कार्यकर्ताहरूले घेराउ गरी हातपातको प्रयास गरेका छन् ।

मन्त्री यादवले जबरजस्ती वडा अधिवेशन गराउन खोजेको भन्दै कार्यकर्ताहरूले उनलाई घेराउ गरी हातपातको प्रयास गरेको स्थानीय कार्यकर्ता जयकुमार यादवले बताए । यधपि प्रहरीको बाक्लो उपस्थितिको कारण धकेलाधकेल मात्र भएर त्यहाँबाट मन्त्री भागेको उनले बताए ।

मन्त्री यादवले लुकाएर गोप्य स्थानमा आफ्ना गुटका कार्यकर्तालाई मात्रै बोलाएर मतदान गराइरहेको थाहा पाएपछि स्थानीय कार्यकर्ताहरूले घेराउ गरी हातपातको प्रयास भएको उनको भनाइ छ ।

मुखियापट्टी मुसहरनिया ५ र ६ मा प्रहरीको सहयोगमा एकलौटी रूपमा माइन्युट गरेर मन्त्री यादवले वडा अधिवेशन गर्न खोजेपछि विवाद उत्पन्न भएको हो ।

उनले प्रहरी प्रशासन भएकै कारण मन्त्री यादव हातपातबाट हुन बाट जोगिएको बताए । सो क्रममा केहिबेर प्रहरी र काँग्रेस कार्यकर्ताबीच तनाब समेत भएको थियो ।

विवादको कारण आज पनि दुबै वडाको वडाअधिवेशन स्थगित भएको छ । भोलि अधिवेशन हुने जनाइएको छ ।

यता मन्त्री यादवले आफुमाथि हातपातको प्रयास नभएको दावी गरे । ‘मलाई कुनै घेराबन्दी र हातपातको प्रयास भएको छैन । यो कुरा निराधर हो ‘, उनले भने ‘मैले जवरजस्ती वडा अधिवेशन पनि गराउन खोजेको होइन । त्यहाँ सबै उस्थित नै थियो । लुकिछिपी कहाँ अधिवेशन गराउन खोजे ?’