मन्त्रालयको भागबन्डा नमिल्दा प्रदेश २ सरकार विस्तारमा ढिलाइ

टुडेपाटी-
जनकपुरधाम, कार्तिक २२ गते ।

भागबन्डा नमिल्दा प्रदेश २ सरकार विस्तारमा ढिलाइ भएको छ ।

पाँचदलीय गठबन्धन इतरका दल नेकपा एकीकृत समाजवादीलाई सरकारमा सहभागी गराउन ढिलाइ भएको हो ।

मन्त्रालय टुक्र्याइए पनि भागबन्डा नमिल्दा सरकार विस्तारमा ढिलाइ भएको छ । करिब चार महिनाअघि मुख्यमन्त्री लालबाबु राउतले ६ मन्त्रालय टुक्र्याएर १० वटा बनाएका थिए ।

१९ प्रदेशसभा सदस्य रहेको नेपाली कांग्रेसले तीन र आठ सांसद रहेको नेकपा माओवादी केन्द्रले एक मन्त्रालयको जिम्मेवारी लिएर सरकारमा सहभागी भइसकेका छन् । पाँच मन्त्रालय जनता समाजवादी पार्टी (जसपा)को भागमा परेको छ । बाँकी दुई मन्त्रालय अहिले मुख्यमन्त्री राउतले सम्हालेका छन् ।

मुख्यमन्त्री राउतले अहिले कानुन, न्याय तथा प्रदेशसभा र वाणिज्य आपूर्ति तथा विज्ञान प्रविधि मन्त्रालयको जिम्मेवारी समेत सम्हाल्दै आएका छन् । यी दुई मन्त्रालय लिएर एकीकृत समाजवादी सरकारमा सहभागी हुन इच्छुक देखिएको छैन ।

एकीकृत समाजवादी पार्टीले आर्थिक मामिला तथा योजना मन्त्रालय र समाजिक विकास मन्त्रालय मध्ये एक मन्त्रालयसहित दुई मन्त्रालय लिने अडानमा छ । आर्थिक र समाजिक विकास मन्त्रालय अहिले जसपाकै छन् ।

दलहरूले मुख्य भन्ने गरिएका मन्त्रालयहरू कांग्रेस र माओवादीले लिइसकेका छन् । बाँकी ती दुई मन्त्रालय लिन एकीकृत समाजवादी इच्छुक नदेखिएको उक्त पार्टीका सांसदहरूले संकेत गरेका छन् ।

सरकारमा सहभागी हुने औपचारिक छलफल अहिलेसम्म नभएकोले ढिलो भएको प्रदेश–२ मा एकीकृत समाजवादी संसदीय दलका नेता शत्रुधन महतोले दाबी गरे । दुई मन्त्रालय पाए सरकारमा जाने उनको भनाइ छ ।

“दुईवटा मन्त्रालय पाएपछि नेकपा (एस) सरकारमा सहभागी हुन्छ । कुन मन्त्रालय दिने त्यो पहिले टुंगो लगाउनुपर्छ,” उनले भने, “केन्द्रीय नेताहरूबीच भएको छलफलानुसार नै सरकार विस्तार हुनेछ ।” प्रदेश–२ प्रदेशसभामा एकीकृत समाजवादीका १३ सांसद छन् ।

केन्द्रमा जस्तै प्रदेश–२ मा पनि जसपा, नेपाली कांग्रेस, माओवादी केन्द्र र एकीकृत समाजवादीको गठबन्धनको सरकार छ । जसपाले सरकारको नेतृत्व गरेको छ । मुख्यमन्त्री राउतले एकीकृत समाजवादीलाई सरकारमा ल्याउन सामाजिक विकास मन्त्रालयलाई टुक्र्याउने प्रक्रिया अगाडि बढाएका छन् ।

प्रदेश–२ मा ३८ सांसद रहेको जसपाले मुख्यमन्त्रीसहित पाँच मन्त्रालय, १९ सांसद रहेको कांग्रेसले तीन र आठ सांसद रहेको माओवादी केन्द्रले एक मन्त्रालयको जिम्मेवारी सम्हालेको छ ।