प्राधानाध्यापकलाई चप्पलले कुटनेहरुलाई कारवाहीको माग गर्दै जनकपुरधाममा शिक्षकको प्रदर्शन

टुडेपाटी-
जनकपुरधाम, कार्तिक १५ ।

प्राधानाध्यापकलाई चप्पलले कुटेको तथा कालोमोसो दली दुव्यर्वहार गरेको विरोधमा शिक्षकहरुले जनकपुरधाममा विरोध प्रदर्शन गरेका छन् ।

सोमबार विद्यालय बन्द गरेर जिल्लाभरका शिक्षकहरु सुरक्षाको माग गर्दै आन्दोलनमा उत्रिएका हुन् ।

जनकपुरधामको रेल्वे स्टेशनबाट जुलस निकाल्दै शिक्षकहरुले नगरको विभिन्न चोकमा परिक्रमा गर्दै प्रदर्शन गरेका हुन् ।

‘शान्ति सुरक्षा कायम गर, शिक्षकलाई दुव्र्यवहार गर्नेमाथि कारबाही गर, जनमत पार्टी मुर्दावाद !’ जस्ता नारा लगाउँदै शिक्षकहरुले प्रदर्शन गरेका हुन् ।

शिक्षकहरुले जिल्ला समन्वय इकाई र जिल्ला प्रशासन कार्यालयमा ज्ञापनपत्र समेत बुझाएका छन् ।

शुक्रवार सबैला नगरपालिकाको रघुनाथपुरस्थित फकिरचन्द उच्च माध्यमिक विद्यालयका प्रधानाध्यापक बैजु साहमाथि विद्यार्थीहरुले कालोमोसो फ्याकेर चप्पल प्रहार गरेका थिए ।

सो घटनामा संलग्नलाई एक हप्ताभित्र कारवाहीको दायरामा ल्याउन प्रशासनलाई शिक्षकहरुले ज्ञापनपत्र मार्फत अल्टिमेटम दिएका छन् ।