नेकपा (एस)मा सनाखत गरेका रौतहटका एक वडाध्यक्ष पुनः एमालेमै फर्के

टुडेपाटी-
रौतहट, कार्तिक ८ गते ।

नेकपा एकीकृत समाजवादीमा सनाखत गरेका रौतहटको चन्द्रपुर नगरपालिका वडा नम्बर ८ का वडा अध्यक्ष पासपत चौधरी पुनः नेकपा एमालेमै फर्किएका छन् ।

एमाले पार्टी कार्यालय चन्द्रनिगाहपुरमा आयोजित नगर कमिटिको बैठकमा चौधरीले एकीकृत समाजवादीमा सनाखत गरे पनि पुनः आफु एमालेमै फर्किएको घोषण गरेका हुन् ।

आफूले सूर्य चिह्नबाट नै चुनाब जितेकाले एमाले छाड्न नसकेको उनले बताए ।

वडा अध्यक्ष चौधरीसँग एकीकृत समाजवादीमा सनाखत गरेकी सोही वडाकी वडा सदस्य उर्मिला हजारा पनि एमालेमै फर्किएकी छन्।

यो नगरपालिका एकीकृत समाजवादीका अध्यक्ष माधवकुमार नेपालको घर भएको नरपालिका हो। नेपालको घर वडा नम्बर ४ मा छ।

यसअघि पनि नेकपा एमालेबाट एकीकृत समाजवादीमा सनाखत गरेको धनुषाको बटेश्वर गाउँपालिका वडा नंं ३ का वडाध्यक्ष हिरालाल महतो र एक वडासदस्य पुन ः एमालेमै फर्किएका थिए ।