जनकपुर खानेपानीका हाकिमलाई अर्धनग्न घुमाउने १० जना पक्राउ, रिहाइको माग गर्दै धर्ना

टुडेपाटी–

जनकपुरधाम, कार्तिक ४ गते ।

नेपाल खानेपानी तथा ढल निकास कार्यालय जनकपुरका निमित प्रमुखलाई अर्धनग्न बजार घुमाउँदै दुव्र्यबहार गर्ने डा. सिकेराउत नेतृत्वका जनमत पार्टीका १० जना नेताकार्यकर्ता पक्राउ परेका छन् ।

निमित प्रमुख राजेश कुशवाहालाई कार्यालयबाट नियन्त्रणमा लिइ अर्धनग्न बनाएर बजार घुमाउने क्रममा उनीहरुलाई पक्राउ गरेको धनुषाका प्रहरी प्रवक्ता डिएसपी जितेन्द्र बस्नेतले जानकारी दिए ।

उनीहरुमाथि कानुन बमोजिम कारबाही हुने उनले बताए ।

यता आफ्ना नेताकार्यकर्ता बिनासर्त रिहाइ गर्नुपर्ने माग गर्दै जनमतपार्टीका नेताकार्यकर्ता जिल्ला प्रहरी कर्यालय धनुषा अगाडि प्रदर्शन गरिहरका छन् । उनीहरु प्रदर्शनसहित धर्नामा बसेका हुन् ।

ढल निकासको काममा वेवास्ता गरेको भन्दै कुशवाहालाई बिहीबार मध्याहन्न जनमत पार्टीका नेताकार्यकर्ता भाटासहित एकाएक कार्यालयमा पुगेर नियन्त्रणमा लिइ कुटपिट गर्दै कपडा च्यातेर अर्धनग्न बनाएका थिए । त्यसपछि नालको हिलो छ्यापेर बजार घुमाएका थिए ।