महोत्तरीकी शिलादेवीको बोक्सी निहुमा देवरले नै हथौडाले हानेर हत्या गरेको खुलासा

टुडेपाटी-
जनकपुरधाम, असोज ३१ गते ।

महोत्तरीकी ४२ वर्षीया शिलादेवी झाको हत्या बोक्सीको निहुमा आफ्नै देवरले गरेको खुलेको छ । बोक्सी निहुमा देवर ४२ वर्षीय संजयकुमार झाले नै हथौडा प्रहार गरी शिलादेवीको हत्या गरेको प्रहरीको अनुसन्धानबाट खुलेको हो ।

महोत्तरी गाउँपालिका ३ मडै निवासी स्वर्गीय लालकिशोर झाकी श्रीमती शिलादेवीको घरमा सुतेकै स्थाममा बिहीबार बिहान टाउकोमा हथौडा प्रहार गरी हत्या भएको थियो ।

श्रीमती रिंकु झालाई टुनामुना गरेको अन्ध विश्वासको निहुमा संजयले भाउजू शिलादेवीको हत्या गरेको महोत्तरीका प्रहरी उपरीक्षक (एसपी) दिनेश आचार्यले बताए ।

जिल्ला प्रहरी कार्यालय महोत्तरीले आइतबार पत्रकार सम्मेलन गरी शिलादेवी हत्या प्रकरण र आरोपी संजयलाई सार्वजनिक गरेको हो । संजय हाल जनकपुरधाम उपमहानगरपालिका २४ सोनापाडामा बसेर ज्यालादारीको काम गर्दै आएका छन् ।

एसपी आचार्यका अनुसार संजय बुधबार राति जनकपुरबाट साइकलमा घर पुगेर बिहीबार बिहान ३ बजेको समयमा भाउजू शिलादेवीलाई सुतिरहेकै स्थानमा हथौडाले टाउकोमा हानेर हत्या गरेका थिए । र पुनः जनकपुर साइकलमै फर्किएका थिए ।

शिलादेवीले दिएको केरा खाँदा श्रीमती रिंकु झाको गर्भ तुहिएको र मुखबाट फिज आउँदा विभिन्न अस्पतालमा उपचार गराउँदा समेत ठीक नभएकाले बोक्सी नै रहेको निहुमा संजयले भाउजूको हत्या गरेको अनुसन्धानबाट खुलेको एसपी आचार्यको भनाइ छ । शिलादेवीको पति लालकिशोर झा र माहिलो छोरा कृष्णा झाको मृत्यु भइसकेको छ ।

यस्तो छ घटनाको कारण

प्रहरीका अनुसार गएको असाढमा संजयको विवाह भएको थियो । त्यस पश्चात शिलादेवीसंगै संगोलमा संजय र उनकी पत्नी रिंकी बस्ने गरेका थिए । शिलादेवीले देवरानी रिंकुलाई केरा खान दिएकी थिइन् । त्यस रात रिंकुको गर्भ तुहिएको थियो । पछि रिंकुको मुखबाट बेला बेला फिज निकाली बिरामी हुन थालिन् ।

रिंकुलाई संजयले विभिन्न अस्पतालमा उपचार गराउँदै आएका थिए । उपचारबाट निको नहुँदा डेढ महिना अघि झाँक्री लगाएका थिए । झाँक्रीले लगाएपछि रिंकुले काम्दै शिलादेवीको माहिलो छारा म कृष्ण कुमार झा हुँ भनि बताएको, श्रीमान लालकिशोर झा र मलाई शिलादेवीले टुनामुना गरी मारेको, अब रिंकु झालाई पनि टुनामुना गरी मार्न लागेको । त्यसकारण केरा खान दिँदा गर्भ तुहिएको बताएकी थिइन् ।

शिलादेवी झालाई संजयले १२ लाख ३९ हजार सापटी समेत दिएका थिए । श्रीमातीलाई टुनामुना गरेको , लिएको सापटी ताकेता गर्दा समेत फिर्ता नगरेकाले भाउजू शिलादेवीको हत्या नगरे परिवार सुखसंग बस्न नसक्ने निष्कर्षमा संजय पुगेका थिए । अन्ततः अन्ध विश्वासको कारण संजयले भाउजूको हत्या गरेको एसपी आचार्यले बताए ।