धनुषामा घाँटी रेटेर सिरहाका एक युवकको हत्या, बाटो छेउमा भेटियो शव

टुडेपाटी-
जनकपुरधाम, असोज ३१ गते ।

धनुषामा एक युवकको घाँटी रेटेर हत्या भएको छ ।

धनुषाको नगराइन नगरपालिका ५ स्थित गंगुलीबाट देवडिहा जाने बाटोको छेउमा सिरहाका एक २८ वर्षीय युवकको गए रति घाँटी रेटेर हत्या भएको हो ।

सिरहाको मिर्चैया नगरपालिका ८ का संजिव पण्डितको घाँटी रेटेर हत्या भएको अवस्थामा आइतबार बिहान शव फेला परेको हो ।

राति नै कसैले घाँटी रेटेर पण्डितको हत्या गरेको हुन सक्ने धनुषाका प्रहरी प्रवक्ता डिएसपी जितेन्द्र बस्नेतले टुडेपाटीलाई जानकारी दिए ।

बिहान स्थानीयले शव देखेपछि प्रहरीलाई खबर गरेका थिए ।

प्रहरी घटनास्थल पुगेर मुचुल्का गरी शव पोस्टमार्टमको लागि प्रादेशिक अस्पताल ल्याएको छ ।

डिएसपी बस्नेतले घटना विषयमा थप अनुसन्धान भइरहेको बताए ।