सप्तरीमा दुई मोटरसाइकल ठोक्किँदा झापाकै दुई युवकको ज्यान गयो, महोत्तरीका एकजना गम्भीर

टुडेपाटी-
सप्तरी, असोज ३० गते ।

सप्तरीमा दुईवटा मोटरसाइकल एकआपसमा ठोक्किँदा दुई युवकको ज्यान गएको छ । अन्य एकजना गम्भीर घाइते भएका छन् ।

शनिबार दिउँसो पूर्व पश्चिम राजमार्ग अन्तर्गत खडक नगरपालिका ४ अमहा स्थित पूर्व तर्फ जँदै गरेको बा. ५६ प २५१५ र विपरीत दिशाबाट आउँदै गरेको स. ५ प ८४३४ नम्बरको मोटरसाइकल एकआपसमा ठोक्किएर दुर्घटना हुँदा झापाकै दुई युवकको ज्यान गएको हो ।

ज्यान जानेमा बा. ५६ प २५१५ नम्बरको मोटरसाइकलमा सवार झापाको शिवसतासी नगरपालिका ६ बस्ने वर्ष २२ का विवेक सापकोटा र स. ५ प ८४३४ नम्बरको मोटरसाइकलमा सवार झापाकै भद्रपुर नगरपालिका ४ बस्ने वर्ष २१ का दयाराम सिंह राजवंशी रहेको सप्तरीका प्रहरी प्रवक्ता डिएसपी माधव प्रसाद काफ्लेले जानकारी दिए ।

दुर्घटनामा स. ५ प ८४३४ नम्बरको मोटरसाइकलमै सवार महोत्तरीको मटिहानी नगरपालिका ७ बस्ने ३५ वर्षीय चन्दन कुमार साह गम्भिर घाइते भएका छन् ।

घाइते साहलाई उपचारको लागि बिराटनगर पठाएको छ । घटना विषयमा थप अनुसन्धान भइरहेको जिल्ला प्रहरी कर्यालय सप्तरीले जनाएको छ ।