सिरहामा झिझिया हेर्न गएका युवकको शव इनारमा

टुडेपाटी-
सिरहा, असोज ३० गते ।

सिरहामा शुक्रबार साँझ झिझिया हेर्न गएका एक युवकको शव इनारमा फेला परेको छ ।

गोलबजार नगरपालिका ८ बस्ने २० वर्षीय शत्रुधन महतो शव नरहा गाउँपालिका ३ स्थित इनारमा शनिबार बिहान फेला परेको हो ।

शनिबार बिहान स्थानीयले इनारमा शव देखेपछि प्रहरीलाई खबर गरेका थिए ।

प्रहरी घटनास्थल पुगेर युवकको शव निकालेर मुचुल्का गरी पोस्टमार्टमको लागि सिरहा अस्पताल पठाउने तयारी गरेको इलाका प्रहरी कार्यालय मिर्चैयाले जनाएको छ ।

मृतक युवक शुक्रबार राति नरहामै आयोजित झिझिया नाच हेर्न गएका थिए । त्यहाँ केहि युवकबीच झगडा भएको थियो ।

बिहान उनको शव इनारमा फेला परेको हो । युवकको हत्या भएको हुन सक्ने स्थानीयको अनुमान छ ।
घटना विषयमा थप अनुसन्धान भइरहेको प्रहरीले जनाएको छ ।