बटेश्वरमा काण्डैकाण्ड, गाउँपालिकामा फेरि तालाबन्दी
टुडेपाटी-
बटेश्वर, असोज २५ गते ।
धनुषाको बटेश्वर गाउँपालिकाका बालविकास शिक्षक तथा कर्मचारीहरुले गाउँपालिकाको कार्यालयमा तालाबन्दी गरेका छन् ।
तलव वृद्धिको माग गर्दै उनीहरूले सोमबार बिहान १० बजेको समयमा पालिकाका सम्पूर्ण बालविकास शिक्षक/शिक्षिकाले गाउँपालिकाको मूलढोकामा ताला लगाएका हुन् ।
Sponsored
तत्कालीन प्रधानमन्त्री केपी शर्मा ओली नेतृत्वको सरकारले घोषणा गरेको बजेट भाषणबाट देशभरका सम्पूर्ण सामुदायिक विद्यालयका कार्यालय सहयोगी र बालबिकासमा कार्यरत शिक्षक/शिक्षकाको तलब वृद्धि गरेर १५ हजार दिने घोषणा गरेका थिए ।
१५ हजारमा ८ हजार संघीय सरकारले र ७ हजार स्थानीय सरकारले दिने गरी बजेट भाषण भएपनि स्थानीय सरकारले आफूहरूको तलव वृद्धि नगरेकोले तालाबन्दी गर्नुपरेको आन्दोलनरत कर्मचारी राजकुमार महतोले टुडेपाटीलाई बताए ।
‘गएको जेठमा तत्कालीन ओली सरकारले गरेको बजेट भाषणबाट निमावि तर्फका र मावि तर्फका कार्यालय सहयोगीको तलब वृद्धि गरेर १५ हजार निर्धारण गर्नुभयो ।’, उनले भने, ‘१५ हजारमा ८ हजार संघीय सरकार र ७ हजार स्थानीय सरकारले दिने कुरा थियोे । तर, स्थानीय सरकारले दिएनन् ।’
Sponsored
आन्दोलनरत शिक्षक कर्मचारीहरुले सरकारले तोकेअनुसारको तलव उपलब्ध गराउन आग्रह गरेका छन् । सरकारले आर्थिक बर्ष २०७८÷०७९ को घोषित बजेट अनुसार तलवभत्ता पाउनुपर्ने माग गर्दै आन्दोलनमा उत्रिएको आन्दोलनरत शिक्षिका कुशम महतोले बताइन् ।
‘छिमेकी स्थानीय तहहरुले नेपाल सरकारले घोषणा गरे बमोजिमको तलब वृद्धि गरेपनि यो गाउँपालिकाले आयव्यय नभएको कारण देखाउदै तलब दिन पन्छिएको छ ।’, उनले भनिन् ।
आन्दोलनरत शिक्षक तथा कर्मचारीहरुले स्थानीय तहले समयमै माग सम्बोधन नगरे गाउँपालिकाभरका सबै सामुदायिक विद्यालयहरु बन्द गरेर सशक्त आन्दोलनमा उत्रिने चेतावनीसमेत दिएका छन् ।
यता बटेश्वर गाउँपालिकाका शिक्षा शाखा प्रमुख रामलाल महतोले आन्दोलनरत शिक्षक तथा कर्मचारीहरुबीच कात्तिक ११ गते बैठक बस्ने गरी सहमति भएको बताएका छन् ।
गाउँपालिकामा चाहिने जति बजेट शिक्षामा निकासी नभएकोले संघीय सरकारले निर्धारण गरेबमोजिमको तलब खुवाउन नसकेको प्रमुख महतोले बताए ।
‘अहिले गाउँपालिकाका केही कर्मचारी तथा पदाधिकारीहरु बाहिर रहेका कारण आउँदो कात्तिक ११ गते बैठक बस्ने गरी सहमति गरेर तलब उपलब्ध गराउने छु’, उनले टुडेपाटीसित भने ।
अहिले आन्दोलनरत बालबिकास शिक्षक तथा कर्मचारीहरुबीचको मौखिक सहमतिपछि गाउँपालिका कार्यालयको मुलढोकामा लगाइएको ताला खोलिएको महतोले जानकारी दिए ।
यसअघि गएको फागुन १७ गते गाउँपालिका अध्यक्ष डम्बरबहादुर राउतले ८ लाख घुस प्रकरणमा समेत गाउँपालिकाको कार्यालयमा तालाबन्दी भएको थियोे ।
