किसानलाई गाडीले कुल्चेर मारेको अभियोगमा भारतीय गृहराज्यमन्त्रीका छोरा पक्राउ

एजेन्सी-
जनकपुरधाम, असोज २४ गते ।

किसानमाथि गाडीले कुल्चिएर हत्या गरेको अभियोगमा भारतीय गृह राज्यमन्त्रीका छोरा पक्राउ परेका छन् ।

भारत केन्द्रीय सरकारका गृह राज्यमन्त्री अजय मिश्राका आशिषलाई प्रहरीले पक्राउ गरेको हो ।

उत्तर प्रदेशको लखिमपुर खिरीका किसानहरुलाई गाडीले कुल्चिएर हत्या गरेको अभियोगमा उनी पक्राउ परेका हुन् ।

सो आरोपका सम्बन्धमा शनिबार प्रहरीले उनीसँग १२ घण्टासम्म सोधपुछ गरेको थियो । डिआईजी उपेन्द्र अग्रवालले घटनाबारे सोधपुछ गर्ने क्रममा आशिषले सहयोग नगरेको र उत्तर दिनबाट पन्छिन खोजेकोले उनलाई न्यायिक हिरासतमा पठाइएको जानकारी दिएका छन् ।

आशिष मिश्रा लखिमपुर खिरीको तिकुनिया किसान हत्याकाण्डका मुख्य आरोपी हुन् । सरकारले ल्याएको एक कानुनविरुद्ध लामो समयदेखि आन्दोलनरत किसानहरुको र्‍यालीमा सहभागीहरुलाई पछाडिबाट कारले ठक्कर दिएर हत्या गरेको आरोप उनीमाथि लागेको छ ।

३ अक्टुबरको यो घटनामा चार जना किसानहरुको मृत्यु भएको थियो । त्यसपछि भड्किएको हिंसामा परी दुई जना भाजपाका कार्यकर्ता, एकजना आशिष मिश्राको गाडी चालक र एक जना स्थानीय पत्रकार पनि मारिएका छन् ।