लकडाउनको अवधिमा क्रिकेट खेलिरहेकालाई सम्झाउन पुगेका प्रहरीलाई नै व्याटले हिर्काउने साह पक्राउ

टुडेपाटी-

बारा, चैत १६ गते ।

देश नै लकडाउन भएको बेला क्रिकेट खेलिरहेका युवाहरुलाई सम्झाउन पुगेका प्रहरीलाई नै व्याटले हिर्काउने एकजना पक्राउ परेका छन् ।

बाराको परवानीपुर गाउँपालिका-५ गण्डक बहुअरी टोलका २७ वर्षीय गणेशकुमार साहलाई पक्राउ गरेको बारा प्रहरीले जनाएको छ ।

कोरोना भाइरसको संक्रमणबाट जोगिन देशभरि लकडाउनको घोषणा गरिएको बेला आफ्नै टोलमा क्रिकेट खेलिरहेका साह लगायतका युवालाई इलाका प्रहरी कार्यालय प्रसौनीबाट खटिएको प्रहरी टोलीले सम्झाउन पुगेको थियोे ।

क्रिकेट नखेल्न सम्झाउने एकजना प्रहरी हवल्दारलाई साहले क्रिकेट ब्याटले हिर्काएको बाराका प्रहरी प्रवक्ता गौतम मिश्रले बताए ।

‘हाम्रो टोली क्रिकेट नखेल भनी सम्झाउन गएको थियो’, मिश्रले भने, ‘युवकले प्रहरीलाई नै क्रिकेट खेलिरहेको ब्याटले हिर्काए।’ प्रहरीलाई ब्याटले हिर्काएपछि साहलाई पक्राउ गरी अभद्र व्यवहार मुद्दा चलाउने तयारी भएको प्रवक्ता मिश्रको भनाइ छ ।

साहलाई थप अनुसन्धानको लागि सात दिनको म्याद थप गराई कारबाही प्रक्रिया अघि बढाइएको प्रहरीले जनाएको छ ।