गौशाला नगरपालिका मेयर उपमेयर लगायतको दैनिक इन्धन खर्च ४५ हजार, वर्षमा झण्डै पौने २ करोड

टुडेपाटी-
जनकपुरधाम, भदौ २६ गते ।

महोत्तरीको गौशाला नगरपालिकाले प्रतिदिन ४५ हजार भन्दा बढी रुपैयाँको इन्धनमा खर्च गर्ने गरेको खुलासा भएको छ ।

यस नगरपालिकाले एक वर्षमा मात्रै १ करोड ६६ लाख रुपैयाँ खर्च गरेको पाइएको छ । महालेखापरीक्षक कार्यालयले सार्वजनिक गरेको ५८ औँ प्रतिवेदनमा गौशाला नगरपालिकाले आर्थिक वर्ष २०७६र७७ मा १ करोड ६६ लाख ६२ हजार २ सय ४ रुपैयाँ इन्धनमा मात्र खर्च गरेको उल्लेख छ ।

सार्वजनिक खर्चमा मितव्ययिता र प्रभावकारिता कायम गर्ने सम्वन्धी नीतिगत मार्गदर्शन, २०७५ मा सवारी साधनको इन्धन, मर्मत खर्चमा एकरुपता ल्याउन निश्चित मापदण्ड बनाई कार्यान्वयनमा ल्याउनु, सरकारी सवारी साधन सरकारी काममा मात्र प्रयोग गर्ने तथा सरकारी सवारी साधन अनाधिकृत व्यक्तिले प्रयोग नगर्ने जस्ता व्यवस्था रहेको छ ।

तर गौशाला नगरपालिकाका मेयर शिवनाथ महतो, उपमेयर आशालामा लगायत जनप्रतिनिधि र कर्मचारीले नियमकानुनको धज्जी उडाउँदै राज्यकोषको रकमबाट मनपरी इन्धन खरिद गरेका छन् ।

जनप्रतिनिधिले इन्धनमा १७ लाख ५६ हजार ९४१ रुपैयाँ, कार्यालय प्रयोजनमा १ करोड ४८ लाख ३३ हजार ८७८ र अन्य प्रयोजनमा भन्दै ७१ हजार ३८५ रुपैयाँ खर्च गरेको पाइएको हो ।

नगरपालिकाले इन्धन खर्चको मापदण्ड तयार गरेको छैन भने सवारी साधन अनुसार वार्षिक इन्धन खर्च र उपयोगको विवरण समेत खुल्ने गरी अभिलेख नराखेको प्रतिवेदनमा उल्लेख छ ।

महालेखाको प्रतिवेदन अनुसार आर्थिक वर्ष २०७६र७७ मा गौशाला नगरपालिकाको १ अर्ब ४२ करोड ७७ लाख १७ हजारको लेखापरीक्षण गर्दा १८ करोड ७९ लाख २० हजार रुपैयाँ बेरुजु ठहरेको छ । जस मध्येबाट १ करोड ६ लाख २० हजार रुपैयाँ असुल उपर गर्न महालेखापरीक्षकको कार्यालयले भनेको छ ।