विदेह नगरपालिका जनप्रतिनिधि र कर्मचारीले यी होटलहरुमा एकवर्षमै खाए २५ लाखको दारु मांस

टुडेपाटी-
जनकपुरधाम, भदौ २५ गते ।

धनुषाको विदेह नगरपालिका जनप्रतिनिधि र कर्मचारीले एक वर्षमै २५ लाख रुपैयाँको मासु मदिरा खाएको खुलासा भएको छ ।

विदेह नगरपालिका मेयर बेचन दास (तत्मा), निमित्त प्रशासकीय अधिकृत संजिव साह लगाययत जनप्रतिनिधि र कर्मचारीले विभिन्न मदिरा पसलमा मासु मदिरा खाएको खुलेको हो ।

महालेखा परीक्षकको कार्यालयले सार्वजनिक गरेको महालेखा परीक्षण प्रतिवेदन २०७८ मा विभिन्न नगरभित्रका विभिन्न मदिरा पसल तथा कोल्ड स्टोरलाई विदेह नगरपालिकाले १३ पटक गरि २४ लाख ९९ हजार ३ सय ५५ रुपैयाँ भुक्तानी दिएको छ ।

आ.व २०७६/०७७ मा त्यतिको खाजा, माछामासु र मदिरा खास गरि मेयर दास र प्रशासकीय अधिकृतले आफ्ना आसेपासेलाई खुवाएको स्थानीयले बताएका छन् ।

महालेखाको प्रतिवेदन अनुसार २०७६ असोजको १६ गते सम्भु मदिरा पसललाई १ लाख १४ हजार ६२०, असोज २८ गते रामसेवक कोल्डस्टोरलाई १ लाख ८२ हजार ८३०, असोज २९ गते होटेल फुलबारीलाई २ लाख २४ हजार ५२५ रुपैयाँ नगरपालिका कार्यालयले भुक्तानी गरेको हो ।

यस्तै २०७६ मंसिर १९ गते दोश्रो पटक होटेल फुलबारीलाई १ लाख १४ हजमर २३५, सोही मितिमा पुन: रामसेवक कोल्डस्टोरलाई १ लाख ६३ हजार ७० रुपैयाँ भुक्तानी दिएको उल्लेख छ ।

पुन: तेस्रोपटक २०७६ माघ १४ गते होटल फुलबारीलाई २ लाख ६४ हजार ८२५ रुपैयाँ , माघ २३ गते सम्भु मदिरा पसललाई ६६ हजार ५७५ रुपैयाँ नगरपालिकाले भुक्तानी दिएको हो ।

त्यसपछि २०७७ वैशाख १२ गते रामसेवक कोल्डस्टोरलाई ३३ हजार ९९०, सोही मितिमा होटेल फुलबारीलाई चौथोपटक २ लाख ८७ हजमर ८३५ रुपैयाँ भुक्तानी नगरपालिकाले गरेको प्रतिवेदनमा उल्लेख्य छ ।

२०७७ असार २४ गतेमा पाँचौ पटक रामसेवक कोल्डस्टोरलाई १ लाख ६४ हजार ८४० रुपैयाँ, सोही मितिमा होटल फुलबारीलाई पनि पाँचौं पटक ३ लाख ४ हजार ५३५ रुपैयाँ र असार ३१ गते छैठौं पटक होटेल फुलबारीलाई ८६ हजार २६० नगरपालिकाले गरेको हो ।

मदिरा पसललाई दिएको सो भुक्तानी नीतिसंगत नरहेको र त्यसो नगर्न महालेखाले भनेको छ ।

विदेह नगरपालिकामा मेयर दास र निमित्त प्रशासकीय अधिकृत संजिव साहले मिलेमतो गरि करोडौं रुपैयाँ भ्रष्टाचार गरेको आरोप लागिरहेको बेला यो महालेखाको प्रतिवेदनले सो कुरा अझै उजागर गरेको छ ।