रौतहटमा बोलबम तीर्थालु चढेको पिकअप नहरमा खस्यो, एकजनाको मृत्यु, पाँच घाइते

टुडेपाटी-
जनकपुरधाम, साउन २५ गते ।

रौतहटमा बोलबम तीर्थालु बोकेको गाडी दुर्घटना हुँदा एकजनाको मृत्यु भएको छ । अन्य पाँचजना घाइते भएका छन् ।

चन्द्रपुर नगरपालिका १ नुनथरमा सोमबार बिहान बोलबम तर्थालु बेकेको ना५च ३१६६ नम्बरको बोलेरो पिकअप गाडी बागमती सिंचाइको नहरमा सडकभन्दा ५० मिटर तल खसेको प्रहरीले जनाएको छ ।

सो गाडी बारा जिल्लाको महागढीमाई नगरपालिकाबाट बोलबमका तीर्थालु बोकेर नुनथरमा रहेको बागमती नदीबाट जल भर्न गएको बेला दुर्घटना भएको हो ।

दुर्घटनामा बारा गढिमाईकी ४५ वर्षीया मीना देवी कोइरीको मृत्यु भएको इलाका प्रहरी कार्यालय चन्द्रपुरले जनाएको छ ।

दुर्घटनामा परेकी एक महिला हराइरहेको तथा पाँच जना घाइतेलाई उपचारका लागि चन्द्रपुर पठाएको प्रहरीले जनाएको छ । १३ जनालाई प्रहरीले उद्धार गरेको छ । पिकअपमा करिब २० जना बोलबम तीर्थालु सवार थिए ।