पर्सामा भोलिदेखि सवारीसाधान जोरविजोर प्रणालीमा चलाउन पाइने

टुडेपाटी-
पर्सा, असार ७ गते ।

पर्सामा भोलिदेखि निजी सवारी साधन जोर बिजोर प्रणाली अनुसार चलाउन पाइने भएको छ ।

सोमबार जिल्ला प्रशासन कार्यालय पर्साले एक सूचना जारी गर्दै संक्रमण दर घटेकोले निजी सवारी साधन मापदण्डको पालना गरी जोरविरोज प्रणलीमा चलाउन पाइने जनाएको हो ।

कोभिड–१९ संक्रमण रोकथाम तथा नियन्त्रणका लागि असार ६ गते जारी गरिएको आदेशमा संशोधन गर्दै प्रशासनले निजी सवारी साधन सञ्चालन गर्न पाउने व्यवस्था गरेको हो ।

जिल्लाभित्र निजी सवारी साधन असार ८ गतेदेखि लागू हुने गरी जोर गते जोर नम्बर र बिजोर गते बिजोर नम्बर हुने गरी सवारी साधन सञ्चालन गर्न पाइने पर्साका प्रमुख जिल्ला अधिकारी पिताम्बर घिमिरेद्वारा हस्ताक्षरित जारी गरिएको सूचनामा उल्लेख छ ।

असार ६ गते बसेको कोभिड व्यवस्थापन समितिको बैठकले मालबाहक सवारी साधन, सुरक्षा र स्वास्थ्य सेवा एवं सो सम्बद्ध कर्मचारीहरुले प्रयोग गर्ने सवारी साधन, एम्बुलेन्स, दमकल, शवबहान, फोहोरमैला ब्यवस्थापन, खाद्यान्न, फलफूल, पेट्रोलियम पदार्थ, पानी, कृषि उपज, तरकारी, दूधजन्य पदार्थ, पशुपन्क्षीको दानालगायत ढुवानीका सवारी साधनहरु, आईसोलेसन एवं होल्डिङ्ग सेन्टरको व्यवस्थापनमा प्रयोग हुने सवारी साधन, अत्यावश्यक सेवा र कार्यमा प्रयोग हुने सवारी साधनहरु बाहेक अन्य सबै प्रकारका निजी (दुई पाङ्ग्रे बाहेक) तथा सार्वजनिक यातायातका सवारी साधनहरु सञ्चालन गर्न नपाइने निर्णय गरेको थियो ।