अमेरिका बन्द हुँदैन : ट्रम्प

टुडेपाटी-

काठमाडौंं, चैत ११ गते ।

कोरोना भाइरसका कारण अमेरिका बन्द नहुने अमेरिकी राष्ट्रपति डोनाल्ड ट्रम्पले बताएका छन् । सोमबार ट्रम्पले कोरोना भाइरसको प्रकोप लगातार बढिरहेको अवस्थामा अमेरिका बन्द गराउनको लागि नबनेको बताएका हुन् ।

आफ्नो प्रशासनले सतर्कतापूर्वक आर्थिक कामहरु पुरानै समयमा सुचारु रुपमा सञ्चालन गर्न निर्देशन दिन सक्ने उनले बताएका हुन् । आफूले सबै पक्षसँग सल्लाह गरेर सबै आर्थिक गतिविधिलाई यथावतरुपमा सञ्चालन गराउने तयारी भइरहेको उनको भनाइ छ ।

ट्रम्पले सबै नागरिकलाई सामाजिक दूरी राख्न सुझाव दिएको केही समयमा नै यस्तो घोषणा गरेका हुन् । अहिलेसम्म अमेरिकामा यो भाइरसको कारण ४६ हजार १४५ जना संक्रमित भइसकेका छन् । यसले अमेरिकाको अर्थतन्त्रमा प्रत्यक्ष रुपमा प्रभाव परेको छ । भाइरसको कारण अमेरिकामा सबै व्यवसाय बन्द भएका छन् भने उल्लेख्य मात्रामा रोजगारीमा कटौती गरिएको छ ।

सोमबार ट्रम्पले भने एक साताभित्रै यथावतरुपमा व्यवसाय चल्न सक्ने बताएका हुन् । उनले यो एउटा चिकित्सासम्बन्धी समस्या रहेको र यसको कारण मुलुकमा वित्तीय संकट आउन नदिने जानकारी दिए ।

अमेरिकामा यो भाइरसको कारण अहिलेसम्म ५८२ जनाको मृत्यु भइसकेको छ ।