घुस फालेर तीन महिनादेखि फरार बटेश्वर गाउँपालिका प्रमुख कार्यालयमा हाजिर, आसेपासेले गरे स्वागत

टुडेपाटी-
जनकपुरधाम, जेठ ३० गते ।

घुस काण्डमा मुछिए पनि कानुनी कारबाहीबाट उम्किन सफल धनुषाको बटेश्वर गाउँपालिका अध्यक्ष डम्बरबहादुर राउतलाई गाउँपालिकामा स्वागत गरिएको छ।

८ लाख घुस फालेर फरार भएको तीन महिनापछि अध्यक्ष राउत आइतबार कार्यालयमा हाजिर भएका हुन्।

उनलाई गाउँपालिकामा जनप्रतिनिधि, कर्मचारी, एमालेका नेता कार्यकर्ता तथा समर्थकहरुले स्वागत गरेका छन्।

सरकारको संरक्षणमा कानुनी कारबाहीबाट जोगिएर आएका अध्यक्ष राउतको विरोधमा जनता समाजवादी पार्टीका नेता कार्यकर्ता, नागरिक समाजलगायत युवाले प्रदर्शन गरेका छन्।

गाउँपालिका कार्यालय अगाडि उनीहरुले विभिन्न नारा लखिएको प्लेकार्डसहित प्रदर्शन गरेका हुन्। प्रदर्शनमा जसपाका नेता राजकिशोर महतो, युवा नेता अजय राउत, श्रवन कुमार, राजेश महतोसहित युवाहरुको सहभागिता थियो।

गएको फागुन १७ गते अख्तियार दुरुपयोग अनुसन्धान आयोग केन्द्रीय कार्यालय टंगालको टोलिले धनुषाको सखुवा महेन्द्रनगरबाट पछ्याएपछि गाउँपालिका अध्यक्ष राउत ८ लाख घुस रकम फालेर भागेका थिए।

गाउँपालिकाको गाडीसहित चालक वीरबहादुर मगरलाई अख्तियारले नियन्त्रणमा लिएको थियो भने उनले फालेर भागेको ८ लाख रुपैयाँ घुस सुक्जोर खोलाको किनारबाट बरामद गरेको थियो।

चालकलाई फेरि हाजिर हुने सर्तमा छाडिएको थियो। गाउँपालिका अध्यक्षले कार्यालयको भवन निर्माण योजनाको भुक्तानीको लागि ठेकेदारबाट ८ लाख रुपैयाँ घुस लिएका थिए।