मुख्यमन्त्री राउतलाई प्रदेश प्रमुख झाको पत्र : सरकारमा महिला, दलित, पहाडी समुदायको पनि प्रतिनिधित्व होस्

टुडेपाटी-
जनकपुरधाम, जेठ ३० गते ।

प्रदेश २ प्रमुख राजेश झाले मुख्यमन्त्री लालबाबु राउतलाई मन्त्रिपरिषद समावेशी बनाउन पत्र लेखेका छन् ।

प्रदेश २ सरकार असमावेशी भएको भन्दै चर्को विरोध भइरहेको बेला प्रदेश प्रदेश प्रमुख झाले पत्र लेखेका हुन् ।

 प्रदेश २ को सरकार बनाउँदा गैरमधेसी (पहाडे समुदाय) लाई समावेश नगरिएको, महिलालाई पनि प्राथमिकता नदिइएको र मधेसी दलितलाई पनि सहभागी नगराइएको भन्दै प्रदेश प्रमुख झाले मुख्यमन्त्रीलाई आइतबार चार पृष्ठ लामो पत्र पठाएका हुन् ।

पत्रमा संविधानको मर्म र भावनाअनुसार मन्त्रिपरिषदमा पहाडे समुदाय, महिला र दलितहरुलाई उचित स्थान दिन भनिएको छ ।  

संविधानले महिला, दलित, आदिवासी जनजाति, मधेसी, थारु, अल्पसंख्यक, अपाङ्गता भएका व्यक्ति, सीमान्तीकृत मुस्लिम, पिछडा वर्ग, यौनिक अल्पसंख्यक, युवा, किसान, श्रमिक आदिको समावेशिता अनिवार्य गरिनुपर्ने भनेको प्रदेश प्रमुखले मुख्यमन्त्रीलाई स्मरण गराएका छन् ।

‘प्रदेश २ मा मूलतः मधेसी समुदायका नागरिकको वसोबास रहेको भएता पनि गैर मधेसी पहाडी मूलका नागरिकहरुको पनि उल्लेख्य बसोबास रहेकोछ,’ प्रदेश प्रमुखको पत्रमा भनिएको छ,‘… प्रदेशको मन्त्रिपरिषदमा उल्लेखित जाति समुदाय र वर्गको अनुहार प्रतिविम्वित हुनुपर्छ भन्ने कुरामा द्विविधा हुन सक्दैन ।’ 

लालबाबु राउत सरकारले दोश्रो पटक काँग्रेसलाई सरकारमा सहभागी गराइ गरेको मन्त्री मण्डल विस्तारमा समेत महिला, गैर मधेसी, दलित लगायत समुदायको प्रतिनिधित्व गराएका छैनन् । त्यस कारण चर्को अालोचना भइरहेको छ ।