रौतहटमा घरायसी विवादका कारण पत्नीमाथि एसिड प्रहार, श्रीमान् पक्राउ

टुडेपाटी-
रौतहट, जेठ २९ गते ।

रौतहटमा घरायसी विवादका कारणका आफ्नै श्रीमतीलाई एसिड प्रहार गरेको आरोपमा श्रीमान् पक्राउ परेका छन् ।

शनिबार साँझ पति सुनचाँदी व्यवसायी दीपक विकलाई प्रहरीले पक्राउ गरेको हो ।

चन्द्रपुर ४ स्थित मनिषा सुनचाँदी पसल सञ्चालन गर्दै आएका विकले श्रीमती दिपिकामाथि एसिड प्रहार गरेको प्रहरीले जनाएको छ । दिपिकाको पाखुरा र पेटमा एसिडले घाउ भएको छ ।

घाइते दिपिकाको अवस्था ठिक रहेको अस्पतालका चिकित्सक एके यादवले जानकारी दिए । ‘घाइतेको अनुहारमा एसिड परेको छैन,’ उनले भने,‘शरीरको भागमा परेकोले अवस्था ठिक छ । उपचार हुँदै छ ।’

इलाका प्रहरी कार्यालय चन्द्रनिगाहपुरका डीएसपी लिलाराज तिमल्सिनाले एसिड प्रहार गर्ने दिपकलाई पक्राउ गरी अनुसन्धान सुरु गरिएको बताए ।

चन्द्रनिगाहपुर चोकबाट केही पूर्व राजमार्गमै सुनचाँदी पसल सञ्चालन गर्दै आएका बिक दम्पत्तीको लामो समयदेखि झगडा हुँदै आएको चन्द्रनिगाहपुर प्रहरीले जनाएको छ ।

अहिले एसिड प्रहारबाट घाइते दिपिकाको स्थानीय एपोलो अस्पतालमा उपचार भइरहेको छ ।