सिरहामा रक्सीको लागि पैसा नदिँदा ८ महिने गर्भवती श्रीमतीलाई जलाएर हत्या, श्रीमान् पक्राउ

विनय यादव-

सिरहा, जेठ २४ गते ।

सिरहामा जलाएर एक महिलाको हत्या भएको छ । धनगढीमाई नगरपालिका–३ हनुमाननगर गाउँमा आठमहिने गर्भवती श्रीमतीलाई जलाएर हत्या गरेको आरोपमा श्रीमान पक्राउ परेका छन् ।

हनुमाननगर गाउँका २९ वर्षीय दीपेन्द्र चौधरीले गत २१ जेठको राति करिब ८ बजेतिर गर्भवती श्रीमती ३० वर्षीया पूजा चौधरीसँग रक्सीका लागि पैसा मागेका थिए । तर, पैसा नदिँदा उनले गर्भवती श्रीमती पूजामाथि पेट्रोल खन्याएर आगो लगाइदिएको प्रहरी अनुसन्धानबाट खुलेको छ ।

जलेर गम्भीर घाइते भएपछि पूजालाई राति नै दीपेन्द्र र सासूले उपचारका लागि लहानस्थित कामना नर्सिङ होम ल्याए । त्यहाँ उनको प्राथमिक उपचार गरियो । त्यसपछि सो अस्पतालले घाइते पूजालाई विराटनगर पठायो । विराटनगरस्थित नोबेल हस्पिटलले पनि रेफर गरेपछि काठमाडौं लैजाने क्रममा उनको बाटोमै ज्यान गएको प्रहरीले जनाएको छ ।

पूजाको मृत्युपछि प्रहरीले श्रीमान् दीपेन्द्रलाई पक्राउ गरेको छ । श्रीमतीलाई आगो लगाएपछि लहान नर्सिङ होममा ल्याएलगत्तै फरार रहेका चौधरीलाई प्रहरीले आइतबार दिउँसो हनुमाननगरस्थित घरबाटै नियन्त्रणमा लिएको हो ।

चौधरीले आफूले श्रीमतीको शरीरमा सलाई कोरेर फालेको स्वीकार गरेको इलाका प्रहरी कार्यालय लहानका डीएसपी डा. तपन दाहालले बताए । चौधरीमाथि कर्तव्य ज्यान मुद्दा चलाइएको प्रहरीले जनाएको छ ।