जनकपुरमा एक युवकको हत्या, बन्द घरमा सँडेको अवस्थामा भेटियो लास

टुडेपाटी-
जनकपुरधाम, जेठ १९ गते ।

जनकपुरको एक बन्द घरमा सडेगलेको अवस्थामा एक युवकको लास फेला परेको छ ।

जनकपुधराम उपमहानगरपालिका ७ बसहिया बस्ने बैद्यनाथ झाको घरमा सिरकले छोपेको अवस्थामा एक युवकको लास फेला परेको धनुषाका डीएसपी मकेन्द्र मिश्रले टुडेपाटीलाई जानकारी दिए ।

अन्दाजी २५–३० वर्षका युवकको शव ७० प्रतिशत भाग सडेगलेर किराले खाएको अवस्थामा बुधबार दिउँसो फेला परेको हो । मृतक युवकको सनाखत हुन सकेको छैन ।

लास भेटेको घरको बाहिरी मूलगेट र कोठाको ढोकामा समेत ताल्चा लागेको थियो ।

कोहि नबस्ने सो घरमा शव गन्हाएपछि स्थानीय बासिन्दाले प्रहरीलाई खबर गरेका थिए । प्रहरी पुगेर घरको बाहिरी र भित्रि ताल्चा फुटाएपछि कोठामा लास भेटिएको डीएसपी मिश्रले बताए ।

उनका अनुसार दुईधुर जग्गामा रहेको उक्त घरमा लामोसमयदेखि कोहि बसिरहेका छैनन् । घरधनी बैद्यनाथ झासहित उनका परिवार उदयपुरको गाइघाट बस्दै आएका छन् । कहिले काही आउँदा उनको परिवार जनकपुरकै पेठिया बजारमा रहेको अर्को घरमा बस्ने गर्दछन् ।
बसहियाको घरमा भने कोहि बस्ने गरेका छैनन् । सोहि घरमा बाहिर र भित्र बन्द रहेको अवस्थामा शव भेटिनु घटना शंकास्पद रहेको डीएसपी मिश्रको भनाइ छ ।

कसैले हत्या गरेर लास लुकाएको हुन सक्ने उनले बताए । घटनास्थलको मुचुल्का गरी शव पोस्टमार्टमको लागि प्रादेशिक अस्पताल जनकपुरमा लगिएको छ । घटना विषयमा थप अनुसन्धान भइरहेको डीएसपी मिश्रले बताए ।

तस्बीर : इन्यूज ब्युरोबाट